Кредит-ахборот таҳлилий маркази (КАТМ) иловасида 3 та янги хизматлар ишга туширилди. Бу ҳақда идора ахборот хизмати хабар берди.

Қайд этилишича, энди «Ишончли кафил» хизмати орқали хизматдан фойдаланувчи кафил бўлишидан аввал қарз олувчи шахснинг кредит тарихи маълумотлари яъни, унинг мажбуриятлари ва уларнинг бажарилиши ҳолати ҳамда скоринг бали билан танишиши мумкин бўлади.

Бундан ташқари, «Кимга кафилман» хизмати орқали фойдаланувчи ҳозирда қайси шахслар бўйича кафил эканини кўриши, мавжуд кафиллик мажбуриятларини назорат қилиши ҳамда молиявий рискларни баҳолаши мумкин.

Шунингдек, фойдаланувчи «Муддати ўтган тўловлар» хизмати орқали асосий қарздорлик бўйича кечиктириб (90 кундан ошган) тўланган тўловлар тўғрисидаги маълумотларнинг кредит тарихидан чиқишини (ўчиб кетишини) кузатиб бориш имкониятига эга бўлади.

«Ушбу янгиликлар фойдаланувчиларга кафиллик мажбуриятларини назорат қилиш, молиявий рискни баҳолаш ва кредит тарихини онгли бошқариш имконини беради», деб ёзади «Банкхабар» Telegram канали.

Ўзбекистондаги банкларда муаммоли кредитлар миқдори бир йилда 3,1 триллион сўмга камайган. Давлат банклари 1,5 триллион сўм, хусусий банклар 1,6 триллион сўмлик муддати ўтган қарзларни сўндира олган.

2026 йил 1 январь ҳолатига кўра, республикадаги банкларнинг жами кредит қолдиғи 604 триллион сўмга етган. Шундан 18,1 триллион сўми (3 фоиз) муаммоли кредитлар ҳисобланади. Таққослаш учун, 2025 йил 1 январда умумий кредитлар 533,1 триллион сўм бўлган. Бунинг 21,2 триллион сўми муддати ўтган (муаммоли) қарзлар эди.

Марказий банк таҳлилида келтирилишича, ўтган ой бошида муаммоли кредитларнинг 70 фоизи—12,8 триллион сўм давлат банкларига тегишли бўлган. Қолган 5,2 триллион сўмлик муддати ўтган қарзларни хусусий банклар ажратган.