Кредит-ахборот таҳлилий маркази мобил иловасида фойдаланувчилар учун учта янги хизмат жорий этилди. Бу ҳақда бюро Telegram-каналида хабар берилди.

Жумладан, «Ишончли кафил», «Кимга кафилман» ҳамда «Муддати ўтган тўловлар» хизматларидан фойдаланиш мумкин.

«Ишончли кафил» хизмати орқали фойдаланувчи кафил бўлишдан аввал қарз олувчининг кредит тарихи билан танишиши мумкин. Унда мажбуриятлар, уларнинг бажарилиш ҳолати ҳамда скоринг бали ҳақидаги маълумотлар акс этади.

«Кимга кафилман» хизмати фойдаланувчига айни пайтда қайси шахслар бўйича кафил эканини кўриш имконини беради. Бу мавжуд кафиллик мажбуриятларини назорат қилиш ва молиявий рискларни баҳолашга хизмат қилади.

«Муддати ўтган тўловлар» хизмати орқали эса асосий қарздорлик бўйича 90 кундан ошган кечиктирилган тўловлар ҳақидаги маълумотларнинг кредит тарихидан чиқарилиши жараёнини кузатиб бориш мумкин.

Январь ойида онлайн кредит олишда фирибгарликка учраганлардан кредитни ундириш тўхтатилиши ҳақида хабар берилганди.