Фуқароларнинг солиқ қарздорлиги ҳақидаги маълумотларини раислар маҳалла гуруҳларида тарқатаётгани юзасидан Самарқанд вилояти солиқ органлари томонидан ўрганиш ишлари олиб борилмоқда.

Қайд этилишича, жисмоний шахслар томонидан тўланган мол-мулк ва ер солиқларининг 10 фоизи тегишли маҳаллаларда қолдирилиб, инфратузилмани ривожлантириш ва ободонлаштириш ишларига йўналтирилади.

«Шу сабабли маҳалла раисларининг ушбу масалаларга масъулият билан ёндашиши табиий ҳол ҳисобланади», дейилади хабарда.

Солиқ кодексига кўра, солиқ тўловчининг идентификация рақами, тўланган солиқлар ва солиқ қарзи ҳақидаги маълумотлар солиқ сири ҳисобланмаслиги ҳам таъкидланди.

Ўзбекистон фуқаросининг шахсий маълумотлари интернетга «сиздирилгани» тўғрисида хабар қилинганди. Статистика қўмитаси, Солиқ қўмитаси, Ички ишлар вазирлиги ўз тизимларига ташқи манбалар орқали бузиб кирилмаганини билдирган.