2026 йил январь ойида Тошкент шаҳрида иккиламчи уй-жой бозорида 1 квадрат метрнинг ўртача нархи қарийб 1120 долларни ташкил этди.

Бу кўрсаткич ой давомида 0,6 фоизга, ўтган йилнинг мос даврига нисбатан эса қарийб 2 фоизга ошган. Иккиламчи бозорда энг юқори ўсиш Яккасарой (5,7 фоиз) ва Миробод (4,3 фоиз) туманларида қайд этилди.

Пойтахтнинг бирламчи кўчмас мулк бозорида нархлар ўсиши янада юқори бўлди. Янги қурилган уй-жойларда 1 квадрат метр учун ўртача нарх йиллик ҳисобда 9 фоиздан кўпроққа ошган. Энг юқори ўсиш Миробод (18,4 фоиз) ва Мирзо Улуғбек (17,3 фоиз) туманларида кузатилган.

Ижара бозори ҳам ижобий динамикани намоён этди. Январь ойида уй-жой ижарасининг ўртача қиймати 1 квадрат метр учун 8,8 долларни ташкил қилиб, бу ўтган йилга нисбатан 9 фоиз юқори бўлди. Миробод, Шайхонтоҳур, Яккасарой ва Мирзо Улуғбек туманларида ижара нархи ўртача 11 доллар атрофида шаклланган.

Шунингдек, ижара нархларининг энг тез ўсиши Олмазор, Юнусобод, Яшнобод, Чилонзор ва Мирзо Улуғбек туманларида қайд этилди. Ушбу ҳудудларда йиллик ўртача ўсиш қарийб 13 фоизни ташкил қилган.

Республика бўйлаб январда кўчмас мулк савдоларининг қарийб учдан бир қисми Тошкент ҳиссасига тўғри келиб, пойтахтда битимлар сони 33,4 фоизга ошди ва ҳудудлар орасида энг юқори кўрсаткич қайд этилди. Шунингдек, Самарқанд вилояти (26 фоиз) ва Сирдарё вилояти (24 фоиз)да ҳам сезиларли ўсиш кузатилди.

Иккиламчи уй-жой бозорида нархлар ўсиши мўътадил бўлди. Республика бўйича 1 квадрат метр учун ўртача нарх бир ойда 0,9 фоизга ошган, йиллик ўсиш эса 8 фоизни ташкил этган. Энг юқори нарх ошиши Сурхондарё вилояти ва Сирдарё вилоятида қайд этилиб, бу ҳудудларда ўртача ўсиш қарийб 24 фоизни ташкил қилган.