Ўзбекистонда автокредит ставкасини пасайтириш ва ҳажмини ошириш чораси кўрилади. Президент Шавкат Мирзиёев 13 февраль куни тармоқ ва ҳудудларда юқори иқтисодий ўсиш суръатларини таъминлаш бўйича асосий вазифалар муҳокамасига бағишланган йиғилишда аҳолининг маҳаллий автомобилларга талабини рағбатлантириш мақсадида шундай топшириқ берди.

Йиғилишда қайд этилишича, Ўзбекистонда йилига 650 минг дона автомобиль ишлаб чиқариш қувватига эга 4 та йирик корхона бор. 2026 йилда 300 дан зиёд маҳаллий корхоналар билан кооперация асосида яна 763 та детални ишлаб чиқаришни бошлаш муҳим экани таъкидланди. Ишлаб чиқариладиган автомобиллар сонини 510 мингга етказиш зарур.

Деҳқон ва фермерларда боғдорчилик трактори, кўчат экадиган, ҳосил йиғадиган, картошка кавлайдиган агротехникаларга талаб ортиб бораётгани, Чирчиқдаги кластер тўлиқ қувватда ишлаб, агротехникаларни арзон нархда чиқарса, лизинг компаниялари билан қулай молиявий инструментлар қилиб берилса, деҳқон ва фермерлар йилига камида 15 мингта техникани сотиб олишга тайёрлиги маълум қилинди.

Давлат раҳбари умуман, автомобиль саноати мутасаддиларига ҳар бир имкониятни мана шундай таҳлил қилиб, жорий йилги ишлаб чиқариш дастурини 10,5 фоизлик ўсишни таъминлашга мослаб қайта кўриб чиқишни топширди.

Марказий банк маълумотларига кўра, 9 февралда автокредитлар ўртача 23 фоиз ставкада ажратилган. Бир ой аввал бу кўрсаткич 23,2 фоиз, ярим йил олдин эса 23,8 фоиз эди. Энг юқори автокредит ставкаси 28,2 фоизни ташкил этган. 21 банкдан 14 тасида ставкалар ўртачадан юқори қайд этилган. Қолган банклар эса кредитларни 18–22,9 фоиз оралиғида ажратган.