Марказий банк 2026 йил январь ойида 7 та банк ва 1 та микромолия ташкилотига жарима қўллади. Бу ҳақда банк ахборот хизмати хабар қилди.

Қайд этилишича, ўтган ойда 27 та масала кўриб чиқилди ва улар бўйича тегишли қарорлар қабул қилинди.

Масалалар кредит ташкилотлари уставига киритилган ўзгартиришларни рўйхатдан ўтказиш, кредит ташкилотларининг устав фондидаги улушига эгалик қилиш учун рухсат бериш ҳамда тўлов ташкилоти фаолиятини амалга ошириш учун лицензия беришга боғлиқ.

Январь ойида «Барака бизнес ҳамкор микромолия ташкилоти» ва «Эффеcтиве моней микромолия ташкилоти» МЧЖлари ўз аризасига асосан микромолия ташкилотлари реестридан чиқарилди. ИТ унисофт гроуп АЖга тўлов ташкилоти фаолиятини амалга ошириш учун берилган лицензия ҳам ўз аризасига мувофиқ бекор қилинди.

Шу билан бирга, 4 та тўлов ташкилотига огоҳлантириш берилиб, корпоратив банк карталарига хизмат кўрсатиш жараёнида қонунбузарлик ҳамда камчиликларга йўл қўйган 7 та банк ва 1 та микромолия ташкилотига нисбатан жарима санкциялари қўлланди.

Январда «Янги банк» АЖ фаолиятида аниқланган камчиликларни бартараф этиш бўйича кўрилган чоралар етарли даражада самара бермагани, жумладан, устав капитали қонунчиликда белгиланган энг кам миқдорга етказмагани ва банк фаолиятига оид қатор талаблар бажарилмагани сабабли лицензиядан маҳрум қилинганди.