Рақобат қўмитаси йирик савдо тармоқлари ҳамда ҳудудлардаги савдо комплексларини Рамазон ойи арафасида ижтимоий муҳим озиқ-овқат маҳсулотлари нархларининг барқарорлигини таъминлаш бўйича огоҳлантирди. Бу ҳақда қўмита матбуот хизмати хабар берди.

Маълум қилинишича, Рамазон ойида талаб кескин ошиши мумкин бўлган маҳсулотлар нархларини назорат қилиш юзасидан чакана савдо тармоқлари ҳамда савдо комплексларига етказиб берувчи корхоналарга тегишли кўрсатмалар юборилган.

Хусусан, нархларни ўзгартириш, логистика харажатлари ошиши ёки бошқа омиллар сабаб нархлар кўтарилиши эҳтимоли юзага келган тақдирда, бу ҳақда қўмитани тезкор хабардор қилиш белгиланган.

Шунингдек, етказиб берувчилар томонидан асоссиз нарх оширилишига йўл қўймаслик юзасидан огоҳлантиришлар бериб бориш вазифаси юклатилган.

Қўмита ижтимоий муҳим озиқ-овқат маҳсулотлари нархлари барқарорлигини таъминлаш бўйича ўз ваколатлари доирасида зарур чоралар кўриб борилишини таъкидлади.

13 февраль куни президент раислигида ўтказилган йиғилишда давлат раҳбари Рамазон ойида деҳқон бозорлари ва йирик савдо комплексларида арзонлашган озиқ-овқат ярмаркаларини бошлаш бўйича топшириқ берганди.