Ўтган бир йил давомида Ўзбекистондаги аксар товар ва хизматлар нархлари 10 фоиздан кам ошди. Марказий банкнинг инфляцияга доир навбатдаги таҳлилидан асосий рақамлар ўрин олган.

Нархлар ўсиши секинлашди

2026 йил январь ойида Ўзбекистондаги йиллик инфляция даражаси 7,2 фоизгача пасайди. Таққослаш учун, бир йил олдин бу кўрсаткич 9,9 фоизни ташкил этган.

«2026 йилнинг январь ойида йиллик инфляциянинг 7,2 фоизгача секинлашиши 2024 йилдаги энергия нархлари эркинлаштирилишининг таъсири тугаши ва нархлар барқарорлашуви билан изоҳланади», дея маълум қилган регулятор..

Таҳлилга кўра, 2025 йил январидан жорий йил январи якунигача бўлган даврда озиқ-овқат маҳсулотлари 5,5 фоиз, ноозиқ-овқатлар 5,2 фоизга қимматлашган. Хизматлар нархи эса йиллик ҳисобда 13,5 фоизга ўсган.

Истеъмол саватидаги 167 турдаги озиқ-овқат маҳсулотларидан 147 тасининг (88 фоиз), 252 турдаги ноозиқ-овқат маҳсулотларидан 232 тасининг (92 фоиз) йиллик нархи 10 фоиздан кам ошган. Ўз навбатида 98 турдаги хизматлардан 66 тасининг (67 фоиз) қиймати 10 фоиздан паст даражада кўтарилган.

Арзонлашган товар ва хизматлар

Бир йил давомида озиқ-овқат маҳсулотларидан қовоқ 57,9 фоиз, бақлажон 30,5 фоиз, тарвуз 27,9 фоизга арзонлашган. Шафтоли 24,5 фоизга, саримсоқ нархи 21,1 фоизга пасайган.

Ноозиқ-овқат маҳсулотларидан йирик ошхона приборлари 2,9 фоизга, кичик маиший приборлар 1 фоизга, А4 қоғоз 0,9 фоизга арзонлашган. Ичимликлар тайёрлаш учун кичик приборлар 0,9 фоиз, кастрюль нархи 0,7 фоиз тушган.

Хизматлардан пул ўтказмалари қиймати 7,5 фоизга пасайган бўлса, нодавлат олийгоҳларда ўқиш 0,5 фоизга арзонлашган. Ўз навбатида микромолиявий хизматлар нархи 0,02 фоизга тушган. Метрода йўл ҳақи ва мустаҳкам ўрнатилган (турғун) алоқа хизмати нархи ўзгармаган.

Нималар қимматлашди?

Марказий банк таҳлилида нархи 10 фоиздан юқори ошган қатор товар ҳамда хизматлар рўйхати келтирилган. Жумладан, йил давомида озиқ-овқатлар таркибида энг юқори нарх ўсиши лимонда кузатилган — 90,8 фоиз. Бир йил ичида қўй гўшти қарийб 27,2 фоизга, суяксиз мол гўшти 25 фоизга, суякли мол гўшти 23,8 фоизга қимматлашган. Шу билан бирга, карам нархи 27,9 фоиз ошган. Яқинда инфляциянинг 45 фоизи озиқ-овқат маҳсулотлари, хусусан, 13 фоизи гўшт ҳисобидан шакллангани маълум қилинганди.

Бир йил давомида нархи энг юқори ўсган ноозиқ-овқат маҳсулот никоҳ узуги бўлган — 32,6 фоиз. Кейинги ўринни 30,2 фоизлик қимматлашиш билан метан банд этган. Шу билан бирга, газета (17,5 фоиз), пропан (12,3 фоиз), цемент (12,2 фоиз) нархлари ҳам 10 фоиздан юқори ўсган.

Хизматлар таркибида автосуғурта нархи рекорд даражада — йиллик 281,8 фоизга ошган. Троллейбусда йўл ҳақи 100 фоиз ўсиш қайд этган.Бир йил мобайнида ички авиарейслар 55,9 фоиз, ҳайдовчилик курслари 48,5 фоиз қимматлашган. Газ нархи эса қарийб 39,2 фоизга кўтарилган. Шу билан бирга, совуқ сув 35,1 фоизга, электр энергияси 8,8 фоизга, мобил алоқа хизматлари 17,9 фоизга қимматлашган.

Маълумот учун, Марказий банк 2026 йил якунига қадар республикада йиллик инфляция даражаси 6,5 фоизга тушиши кутилаётганини прогноз қилган.