Ўзбекистонда давлат томонидан ажратиладиган имтиёзли ипотека кредитлари миқдори 15 фоизга оширилади. Бу ҳақда 2026 йил 16 февраль куни янгидан тасдиқланган «Ўзбекистон 2030» стратегиясида белгиланган.

2026 йил 1 мартда мамлакатда бозор тамойилларига асосланган ипотека кредитлари орқали аҳолини уй-жой билан таъминлаш дастури қабул қилинади. Дастур доирасида жорий йил учун жами 23 триллион сўм ипотека кредитларини ажратиш кўзда тутилган. Шундан 12,2 триллион сўм давлат бюджетидан, 7,8 триллион сўм банклар маблағларидан ва 3 триллион сўм «Ўзбекистон ипотекани қайта молиялаштириш компанияси» АЖ ҳисобидан йўналтирилади.

Стратегияда 2026 йил давомида битта квартира учун ажратиладиган имтиёзли ипотека кредити миқдорини Тошкент шаҳрида 480 миллион сўмга, ҳудудларда эса 380 миллион сўмга етказиш белгиланган. Йил давомида ипотека кредитлари бўйича 2,7 триллион сўм субсидиялар ажратиш кўзда тутилган.

«Ажратиладиган ипотека кредити маблағлари ҳисобига 73 мингдан зиёд оилалар уй-жойлар билан таъминланади. 30 минг нафар фуқарога ипотека кредитлари бўйича бошланғич бадал ва фоиз харажатлари учун субсидиялар ажратилади», дейилади ҳужжатда.

​Маълумот учун, ҳозирда битта квартира учун ажратиладиган имтиёзли ипотека кредитининг миқдори Тошкент шаҳрида 420 миллион сўм, ҳудудларда 330 миллион сўмни ташкил этади. :Жорий йил давомида мазкур миқдор 15 фоизга оширилади. Стратегияда 2026 йилда мамлакатда қурилиш ишлари ҳажмини 11 фоизга кўпайтириб, 30 миллиард долларга етказиш ҳам белгиланган. Тижорат банклари томонидан аҳолига жами 125 триллион сўмлик истеъмол кредитлари йўналтирилишини таъминлаш вазифаси қўйилган.