Ўзбекистонда пенсиядан чегирмалар чекланади ва жамғариб бориладиган тизим ислоҳ қилинади
Ҳар ойлик чегирмаларни пенсиянинг 50 фоизидан оширмаслик ва чегирма қўллангандан сўнг даромадни камбағаллик чегарасидан паст туширмаслик режалаштирилмоқда.
Ўзбекистонда пенсиялардан тўловларни чегириш жараёнида пенционерлар учун ижтимоий кафолатларни кучайтириш, пенсиялардан чегирмалар миқдорининг энг юқори чегарасини белгилаш ҳамда жамғариб бориладиган пенсия ҳисобварақлари тизимини ислоҳ қилиш режалаштирилмоқда. Бу 16 февраль куни қабул қилинган 2026 йилга мўлжалланган давлат дастури тўғрисидаги президент фармонида назарда тутилган.
Ҳужжатга мувофиқ, «Фуқароларнинг давлат пенсия таъминоти тўғрисида»ги қонунга ўзгартиришлар киритиш кўзда тутилган. Унга кўра, пенсиялардан чегирма қилингандан сўнг пенционерга тўланадиган пенсия миқдори расман белгиланган энг кам истеъмол харажатларидан оз бўлмаслигини назарда тутувчи норма жорий этилади.
Ташаббусга кўра, чегирма (жарималар, алиментлар, коммунал ва бошқа қарзлар) қўллангандан сўнг пенционерга тўланадиган пенсия миқдори расман белгиланган энг кам истеъмол харажатларидан оз бўлишига йўл қўйилмайди. Ҳозир бу кўрсаткич — 669 минг сўм.
Қўшимча равишда, ҳар ойлик чегирмалар миқдорига қонунчиликда чеклов ўрнатиш режалаштирилган. Унга кўра, чегирмалар миқдори ҳисобланган пенсиянинг 50 фоизидан ошмаслиги лозим.
Ўзгаришларни тайёрлаш учун Иқтисодиёт ва молия вазирлиги ҳамда Ижтимоий ҳимоя миллий агентлиги масъул этиб белгиланган.
Жамғариб бориладиган пенсия
2026 йил центабрига қадар фуқаролар пенсия ёшига етганда уларнинг шахсий жамғариб бориладиган пенсия ҳисобварақларидаги маблағларни беришга рухсат этувчи ҳужжат ишлаб чиқилиши режалаштирилган.
Шунингдек, 2026 йил охиригача жамғариб бориладиган пенсия тизимини ислоҳ қилиш бўйича комплекс дастур тайёрланади.
Таклиф этилаётган ўзгаришлар қаторида:
- пенсия жамғармаларини капиталлаштиришнинг самарали механизмларини жорий қилиш (улар инфляция таъсирида қадрсизланмасдан реал даромад келтириши учун);
- пенсия жамғарма маблағларини самарали сафарбар қилиш ва узоқ муддатли инвестицияга йўналтириш механизмларини жорий қилиш орқали капитал бозорини ривожлантириш;
Ислоҳотларни тайёрлаш учун Иқтисодиёт ва молия вазирлиги ҳузурида халқаро консультантлардан иборат бўлган махсус лойиҳа офиси ташкил этилади.
