19 февраль куни олий тоифали ўқитувчиларни ижтимоий қўллаб-қувватлаш чора-тадбирлар тўғрисидаги ҳукумат қарори (ВМҚ-69-сон) қабул қилинди.

2026 йилдан бошлаб камида 15 йил иш стажи ва олий малака тоифасига эга, бош ўқитувчи лавозимидаги педагогларга ипотека кредити учун бошланғич тўловнинг 25%ини буджетдан қоплаб бериш тартиби жорий этилади.

Субсидия Иқтисодиёт ва молия вазирлиги томонидан қайта молиялаштириладиган ипотека кредитлари доирасида, бирламчи уй-жой бозоридан квартира сотиб олиш учун ажратилади. Бунинг учун буджетдан ҳар йили 200 млрд сўмгача маблағ йўналтирилади.

Аризалар Давлат хизматлари марказлари ва Ягона портал (мй.гов.уз) орқали бепул қабул қилинади ҳамда субсидия.идм.уз платформаси орқали инсон омилисиз кўриб чиқилади. Субсидиялар вазирликнинг субсидйплатформ.мф.уз тўлов платформаси орқали автоматик тарзда тўланади.

Бунда маблағлар ариза берувчининг доимий рўйхатдан ўтган ҳудудидаги уй-жойлар учун йўналтирилади. Шунингдек, Тошкент шаҳрида доимий рўйхатдан ўтган фуқаролар Тошкент вилоятидаги уй-жойни ипотека асосида сотиб олиши мумкин.

Бандлик вазирлиги Мактабгача ва мактаб таълими вазирлиги ҳамда Олий таълим, фан ва инновациялар вазирлиги билан биргаликда икки ҳафтада олий малака тоифасига ва камида 15 йил иш стажига эга педагоглар тўғрисидаги маълумотлар базасини шакллантириши керак.

Таълим ташкилотида фаолият олиб бораётган, олий малака тоифасига (бош ўқитувчи лавозими) эга ва 60 ёшгача бўлган педагоглар ипотека кредити бошланғич бадалининг бир қисмини қоплаш учун ариза беришлари мумкин.

Ариза берувчининг қуйидаги маълумотлари текширилади:

• ариза берувчи ва унинг турмуш ўртоғи ўртасида расмий никоҳ тузилгани;
• улар номида икки ва ундан ортиқ мулк ҳуқуқи билан турар жой мавжудлиги;
• камида 15 йил иш стажига эгалиги ва айни вақтда фаолият юритаётгани;
• олий малака тоифасига эгалиги;
• кредит тарихи банклар талабларига мослиги.

Ижтимоий мезонларга мос келган ариза берувчи талабгор сифатида тан олинади. Бироқ субсидия ажратиш тўғрисидаги хабарнома ипотека кредити берилишини кафолатламайди, бунда кредит ажратилиши банклар томонидан алоҳида кўриб чиқилади.

Шу билан бирга, ариза талабга жавоб бермаса, нотўғри ёки сохта маълумот тақдим этилса, кредит тарихи талабга жавоб бермаса, бошқа уй-жой субсидия дастуридан фойдаланилган ҳамда ажратиладиган маблағлар тугаган бўлса талабгорлар автоматик тарзда рад этилади.

Субсидия бир оила (эр ёки хотин) учун фақат бир марта берилади.