2026 йил январь ойида ўзбек сўмининг алмашув курси 1,4 фоизга қадрсизланди. Бу ҳақда Марказий банк маълум қилди.

Таҳлилга кўра, ўтган ойда миллий валюта алмашув курси тебранувчанлиги 0,43—0,74 фоиз оралиғида бўлган. Бир йил аввалги кўрсаткич эса 0,17—0,21 фоиз диапазонида шакланганди.

«Ўтган ойда валюта курси 12 025—12 199 сўм диапазонда шаклланиб, 1,4 фоизга қадрсизланди. Ушбу кўрсаткич 2025 йилнинг январь ойида 0,3 фоизга тенг бўлган», дея қайд этган регулятор.

Бунда миллий валюта қадрсизланиши бир йилда қарийб 1,1 фоизга юқори шаклланган.

Январь ойида сотиб олинган хорижий валюталарнинг 49,1 фоизи ишлаб чиқариш учун асбоб-ускуналар, товарлар ва хомашё импортига тўғри келган. Яна 25,3 фоизи хорижий валютадаги кредитларни сўндириш, 21,3 фоизи халқ истеъмоли товарлари ва дори-дармон маҳсулотлари импортига сарфланган.

Хўжалик юритувчи субъектлар чет эл валютасининг 39,6 фоизини экспорт тушумлари ҳисобига сотган. Яна 34,5 фоизи пулларни валюта кредитлари сотилиши ҳисобига савдога чиқарган. Қолган 22,6 фоизи бошқа манбалар ҳисобига валюта сотган.

Марказий банк Республика валюта биржасининг «матчинг» сессияси бўйича маркет-мейкерлар фаоллигини ҳам таҳлил қилган. Қайд этилишича, январда валюта бозорида маркет-мейкерлар (биржада пул мувозанатини таъминловчи банклар) сони бештани ташкил этган. Уларнинг жами валюта савдосидаги улуши 34,2 фоизга етган. Таққослаш учун, 2025 йил январда биржада иккита банк маркет-мейкерлик статусига эга эди ва умумий савдодаги улуши 18,8 фоиз бўлган. Бир йил ичида биржада ликвидликни таъминловчи банклар сони иккитадан бештага, улар амалга оширган савдолар ҳажми икки бараварга ошган.