Ўзбекистонда ягона солиқ ҳисобварағини жорий этиш режалаштирилмоқда. Солиқ қўмитаси матбуот хизмати хабарига кўра, бу борада россиялик мутахассислар билан ўзаро тажриба алмашилган.

Ўзбекистон Солиқ қўмитаси, Иқтисодиёт ва молия вазирлиги, Ғазначилик хизмати қўмитаси, Марказий банк ва уларнинг Ахборот технологиялари маркази ходимларидан ташкил топган делегацияси ишчи ташриф билан Москва шаҳрида бўлиб турибди.

Улар россиялик ҳамкасблари билан ўзаро тажриба алмашмоқда. Хусусан, улар ягона солиқ ҳисобварағини қўллаш амалиётини ўрганди.

Қайд этилишича, ягона солиқ ҳисобварағи барча солиқлар ва тўловларни ягона ҳисобда жамлайди, бу эса ҳисоб-китоб ва маъмуриятчилик жараёнларини сезиларли даражада соддалаштиради. Амалиётда бу барча солиқлар бўйича ягона тўловни амалга ошириш, ягона реквизитлардан фойдаланиш ва ҳисобот тақдим этишнинг ягона муддатларини белгилашни англатади.

Бу солиқ тўловчиларга қуйидаги имкониятларни яратади:

• солиқларни тўлаш жараёнини соддалаштириш ва бюджет билан ўзаро ҳисоб-китобларни янада қулай қилиш;
• нотўғри тўловларнинг олдини олиш ҳамда ортиқча пеня ҳисобланишини бартараф этиш;
• турли солиқлар бўйича бир вақтнинг ўзида ортиқча тўлов ва қарздорлик мавжуд бўлиши ҳолатларини истисно қилиш;
• Ягона солиқ ҳисобварағига тушган маблағларни солиқ мажбуриятлари ҳисобидан автоматик тарзда ҳисобга ўтказиш орқали ортиқча жараёнларнинг олдини олиш.

Тажриба алмашиш илғор амалиётларни ўрганиш ва уларни Ўзбекистон солиқ тизимини янада ривожлантиришда қўллашга хизмат қилади, дейилади хабарда.

Аввалроқ Ўзбекистон Солиқ қўмитаси делегацияси блогерлар даромадлари устидан солиқ назорати амалиётини ўрганиш мақсадида Россия Федерал солиқ хизматига ташриф буюрган эди. Яқинда блогерларнинг реклама фаолияти мамлакат ЯИМ таркибида расман ҳисобга олинди. Бозор ҳажми 62 млн долларга баҳоланган.