АҚШ ва Исроил Эронга йирик зарбалар бериб, олий раҳнамо оятуллоҳ Али Хоманаийнинг ўлдирилиши ортидан олтин нархи ошди, бу эса геосиёсий кескинлик ва глобал иқтисодий ноаниқликнинг кучайишига олиб келди. Бу ҳақда Reuters нашри хабар берди.

Тошкент вақти билан соат 11:00 ҳолатига кўра, олтин нархи 2,50% га ошиб, бир унция учун 5385,70 ни ташкил қилди ва сўнгги тўрт ҳафта ичидаги энг юқори даражага кўтарилди. Сессия бошида олтин нархи 2% гача ошган эди.

Ҳозирги вақтда қимматбаҳо металлнинг савдолардаги нархи $5400 атрофида шаклланмоқда.

Reuters нашрининг ёзишича, АҚШ ва Исроилнинг Эронга зарбалари жаҳон бозорларида ноаниқликни кучайтирди ва инвесторлар қимматбаҳо металларнинг потенциал оқимини ҳимоя активлари сифатида диққат билан кузатиб бормоқда.

«Эҳтимол, олтин глобал ноаниқликни акс эттирувчи энг яхши барометрдир ва, мажозий маънода айтганда, ҳарорат кўтарилмоқда. Биз бутунлай янги геополитик ноаниқлик даврига кирар эканмиз, олтин нархи қайта баҳоланиб, янги рекорд даражаларга етишини кутиш керак», — деди мустақил таҳлилчи Росс Норман.

29 январь куни жаҳон бозорида ҳам янги нарх рекорди ўрнатилди — троя унцияси $5559 га ёки бир грамми $178,73 га етганди.

Бир кунда қимматбаҳо металл нархи 9,3% га, йиллик ҳисобда эса 80% дан ортиққа қимматлашди. Кумушнинг троя унцияси нархи эса ўтган кунга нисбатан 11,4% га ошиб, $118,3 га кўтарилди.

Февраль ойи бошида JP Morgan 2026 йил охиригача олтин нархини бир унция учун $6300 га кўтарилиши ҳақидаги башоратини оширганди.

Бунга марказий банклар ва инвесторларнинг барқарор ва кучайиб бораётган талабига асосланиб, сўнгги кескин нарх ўзгаришлари сабаб бўлган.

Қайд этилишича, прогнознинг ошишига асосий сабаб расмий сектор томонидан талабнинг кутилганидан кўра кучлироқ эканлиги ҳисобаланади.