Ўзбекистон олтин захиралари ҳажми 390,3 тоннага етиб, глобал рейтингда 14-ўринни эгаллади. Бу ҳақда Жаҳон олтин кенгаши ҳисоботида маълум қилинди.

Таҳлилларга кўра, Ўзбекистон олтин захиралар ҳажми бўйича Португалия (382,7 тонна) ва Қозоғистонни (341 тонна) ортда қолдирган.

Республика 2025 йилда 7,8 тонна қимматбаҳо металл сотиб олган. 2020 йилдан 2025 йилгача бўлган даврдаги харид ҳажми 54,4 тоннани ташкил этган.

Кенгаш Полша 2025 йилда олтин сотиб олиш бўйича глобал етакчига айланганини қайд этган. Мамлакат Марказий банки йил давомида қариб 102 тонна қимматбаҳо металл харид қилган. Қозоғистон 57 тонна сотиб олиш билан иккинчи ўринни эгаллаган.

Озарбайжон эса 53,4 тонна билан кучли учликда қайд этилган. Бразилия ва Туркия ҳам етакчи бешликка кирган. Қимматбаҳо металл нархи йил давомида кескин ўсишни кўрсатган. Яъни 2025 йил бошида олтиннинг бир унцияси 2 800 доллар атрофида бўлган. 2026 йил бошида эса бу қиймат қарийб 5 000 доллардан ошган.

Жаҳон олтин кенгаши ўтган йили олтиннинг асосий сотувчилари Сингапур (26,4 тонна) ва Россия (6,2 тонна) бўлганини маълум қилган. Узоқ муддатда, 2020 йилдан бери Хитой энг йирик харидор бўлиб қолмоқда. Мамлакат жами 358 тонна олтин тўплаган. Дунё миқёсида АҚШ 8 100 тонна захира билан биринчи ўринда туради. Етакчи бешликка Германия, Италия, Франция ва Россия ҳам киради.

2026 йил 1 февраль ҳолатига кўра, Ўзбекистоннинг олтин-валюта захиралари рекорд даражадаги 75 миллиард долларга етган. Шундан 65 миллиард доллари олтин захирасининг қиймати ҳисобланади.