Марказий банк тижорат банклари ва тўлов ташкилотларига мобил иловалар орқали ўтказмалар амалга оширилганда “ўтказма мақсадини кўрсатиш” бўйича кўрсатма жўнатган. Унга кўра, фойдаланувчи ўтказмани амалга оширганида мажбурий равишда ўтказма мақсадини танлаши керак бўлади. Банк соҳасига оид янгиликлар бериб борувчи “Банк ва мижоз” каналининг ёзишича, ҳозирча айрим иловаларда бу талаб ишга туширилган, айримларида эса йўқ.

Жўнатилган кўрсатмада P2P ўтказмалари учун мақсадлар 16 турга ажратилган. Улар орасида товарлар ва хизматлар учун тўлов, озиқ-овқат харажатлари, оила ёки қариндошларга ўтказма каби тоифалар мавжуд.

Марказий банк вакилига кўра, рақамли хизматларни ривожлантириш доирасида банклар ва тўлов ташкилотлари мобил иловалар функсионалини босқичма-босқич янгилаб боришлари мумкин. Жумладан, пул ўтказмаларини амалга оширишда аниқлаштирувчи параметрлар жорий этилиши мумкин.

Бундай янгиланишлар техник хусусиятга эга бўлиб, сервис ишини такомиллаштириш ва операцияларнинг тўғри қайта ишланишини таъминлашга қаратилган. Фойдаланувчи томонидан киритилган маълумотлар мобил илованинг стандарт ишлаш жараёни доирасида қайта ишланади ва учинчи шахсларга тақдим этилмайди.

“Фойдаланувчилардан ўтказмани тасдиқлашдан олдин реквизитларни диққат билан текшириш, тасдиқлаш кодларини учинчи шахсларга бермаслик ҳамда молиявий қарорларни ўйлаб, шошилмасдан қабул қилиш тавсия этилади”, дейди Марказий банк вакили.

Февраль ойида Марказий банк пул ўтказмаларини тоифаларга ажратган ҳолда статистик маълумотларни эълон қилганди. 2025 йилдаги P2P ўтказмалари бўйича таҳлилларга кўра, 1–5 млн сўм оралиғидаги ўтказмаларнинг улуши 16,8 фоизни ташкил қилган. Фуқаролар карта орқали пул ўтказмаларидан асосан кундалик ҳисоб-китоблар ва ўзаро тўловлар учун фойдаланган.