Марказий банк 2026 йил 2 март ҳолатига кўра, тижорат банклари томонидан аҳолига ажратилаётган микроқарз ва автокредитлар бўйича янгиланган ўртача фоиз ставкаларини эълон қилди. Янги ҳафтада микрокредитлар бўйича ўртача ставка 29,6 фоизни, автокредитлар бўйича эса 22,5 фоизни ташкил этди.

Ўтган ҳафта ушбу кўрсаткичлар мос равишда 29,3 фоиз ва 22,9 фоиз даражасида қайд этилган эди. Автокредитлар бўйича янги ҳафтадаги кўрсаткич фоиз ставкаларини эълон қилиш бошлангандан бери кузатилган энг паст даража бўлди. Микрокредит ставкалари эса ўтган ҳафтада рекорд даражада пасайиш қайд этганди.

Микрокредитлар

Микрокредитлар сегментида энг паст ставка 22,4 фоиз билан «Алоқабанк» томонидан таклиф этилмоқда. Ундан кейин «Инфинбанк» 24,3 фоиз ва «Трастбанк» 24,7 фоиз ставка билан нисбатан мақбул шартларни тақдим қилмоқда. Ўтган ҳафтада эса энг паст ставка 22,7 фоиз бўлиб, бозор ўртачаси 29,3 фоизни ташкил этган.

Ўрта сегментда БРБ — 25,2 фоиз, Миллий банк 25,3 фоиз ва OFB — 25,9 фоиз атрофида микрокредит ажратмоқда. Энг юқори ставкалар Анорбанкда 41,9 фоиз, Tengebank’да 42,7 фоиз ва TBC Bank’да 40,5 фоиз даражасида шаклланган.

Автокредитлар

Автокредитлар бозорида янги ҳафта ҳолатига кўра энг паст ставка 16,9 фоиз билан «Ипотека банк» томонидан таклиф этилмоқда. Шунингдек, «Апекс банк» 18,5 фоиз ва «Давр банк» 20,1 фоиз ставка билан нисбатан мақбул шартларни тақдим этмоқда.

Ўрта сегментда OFB — 22,4 фоиз, «Алоқабанк» — 22,5 фоиз ва «Миллий банк» 22,6 фоиз ставка билан автокредит ажратмоқда. Шунингдек, «СҚБ» 24,0 фоиз ва Ziraatbank 24,8 фоиз даражасида кредит таклиф қилмоқда.

Юқори сегментда автокредит ставкалари Madad invest bank’да 27,9 фоиз, «Микрокредитбанк»да 27,7 фоиз ва «Асакабанк»да 26,8 фоиз даражасида шаклланган.