Ўзбекистондаги банклар 2025 йилда аҳоли ва бизнесга 390 триллион сўм кредит ажратди. Фоизли қарз ажратиш кўрсаткичи 2024 йилдагига (287,2 триллион сўм) нисбатан қарийб 36 фоизга ошган.

Марказий банк таҳлилига кўра, ўтган йили мамлакатда кредитлаш фаоллиги барқарор ўсган.

Йил давомида миллий валютада ажратилган кредитлар 276,4 триллион сўмга етган (2024 йилда — 193,3 триллион сўм). Шундан 156,8  триллион сўми жисмоний шахсларга, 108,8 триллион сўми корхоналарга берилган. Сўмдаги фоизли қарзлар умумий портфел ўсишининг асосий манбаси бўлган.

“2025 йилда якка тартибдаги тадбиркорларга — 10,8 триллион сўм миқдорида кредитлар ажратилди”, дейилади Марказий банк таҳлилида.

​Ўтган йилда чет эл валютасида берилган кредитлар сўм эквивалентида 113,6 триллион сўмни ташкил этган (2024 йилда — 94 триллион  сўм). Хорижий кредитларнинг асосий улуши, яъни 113,1 триллион сўми корхоналар ҳиссасига тўғри келган. Қолган 441,5 млрд сўмни якка тартибдаги тадбиркорлар олган.

“2024–2025 йилларда ажратилган кредитлар таркибида миллий валютада молиялаштириш улуши ошган, юридик шахсларнинг чет эл валютасидаги кредитларга талаби сақланиб қолган”, дея қайд этган регулятор.

​Аввалроқ Марказий банк 2025 йилда сўмнинг долларга нисбатан алмашув курси 6,9 фоизга мустаҳкамланганини маълум қилган. Бу иқтисодиётда сўмга бўлган ишончни оширган муҳим омил экани билдирилган.