2026 йилнинг январь ойида Ўзбекистон дунёда олтиннинг энг йирик харидори бўлди. Бу ҳақда Жаҳон олтин кенгаши маълум қилди. Ҳисоботга кўра, йил бошида марказий банклар томонидан олтин харид қилиш суръати аввалги 12 ойлик ўртача 27 тонналик кўрсаткичга нисбатан секинлашди. Январь ойида соф олтин харидлари жами 5 тоннани ташкил этди.

Олтин нархларининг ўзгарувчанлиги ва байрамлар мавсуми айрим марказий банкларни бироз хариддан тўхтатган бўлиши мумкин. Шунга қарамай, пасайиш аломатлари деярли сезилмаётган геосиёсий кескинликлар 2026 йил давомида ва ундан кейин ҳам олтин захираларини кўпайтириш жараёнини давом эттиришга туртки бўлиши кутилмоқда.

Энг йирик харидор Ўзбекистон Марказий банки бўлди. Мамлакат октабрдан бери келаётган харидлар сериясини давом эттириб, январда 9 тонна олтин харид қилди. Натижада олтин захиралари 399 тоннага етиб, умумий захираларнинг 86% ини ташкил этди.

Кейинги ўринни олтин харидорлари қаторига янгидан қўшилган Малайзия марказий банки —Bank Negera Malaysia эгаллади. У ўз захираларини 2018 йилдан бери илк бор 3 тоннага оширди. Шунингдек, Чехия ва Индонезия (ҳар бири 2 тоннадан), Хитой ва Сербия (ҳар бири 1 тоннадан) регуляторлари ҳам олтин сотиб олди.

Январь ойида энг йирик соф сотувчи Россия Марказий банки бўлди — 9 тонна. Ундан кейинги ўринда Болгария (2 тонна), Қозоғистон ва Қирғизистон (ҳар бири 1 тоннадан) марказий банклари туради.

WGC’нинг қайд этишича, Марказий банклар томонидан олтинга бўлган талабнинг кенгайиши 2026 йилнинг асосий тенденцияларидан бирига айланиши мумкин. АҚШ-Эрон ўртасидаги кескинлик кучайиши давом этаётгани ва дипломатик ечим кўринмаётгани боис, келгуси 10−15 кун бу йилги геосиёсий вазиятни шакллантиришда ҳал қилувчи аҳамият касб этиши мумкин.