Тошкент шаҳрида йирик яшил ҳудудларни ташкил этиш бўйича янги лойиҳалар амалга оширилади. Бу ҳақда Вазирлар Маҳкамасининг 2026 йил 28 февралдаги 83-сонли қарорида белгиланган.

Қарорга мувофиқ, пойтахтнинг 9 та ҳудудида умумий майдони 139,6 гектарни ташкил этувчи жамоат парклари барпо этилиши режалаштирилган. Лойиҳаларни амалга ошириш “Тошкент инвест компанияси” акциядорлик жамияти томонидан олиб борилади.

Янги яшил ҳудудларни барпо этиш учун маблағлар асосан инфратузилма тўловлари ва бошқа тушумлар ҳисобидан шакллантирилади. Ушбу тартиб инвестиция ва қурилиш лойиҳалари орқали тушадиган маблағларнинг бир қисмини жамоат учун мўлжалланган яшил маконлар яратишга йўналтириш имконини беради.

Шунингдек, қарорда барпо этиладиган паркларга махсус муҳофаза мақоми берилиши белгиланган. Улар консервация зонаси сифатида белгиланиб, келгусида ушбу ҳудудларда бошқа турдаги қурилиш ишлари олиб борилмаслиги таъминланади.

Лойиҳаларни босқичма-босқич амалга ошириш режалаштирилган бўлиб, янги парклар шаҳардаги дам олиш ҳудудларини кўпайтириш ва экологик муҳитни яхшилашга хизмат қилиши кутилмоқда.