Энди ҳомиладорлик ва туғиш нафақаси миқдорини Ягона портал орқали билиш мумкин. Бу ҳақда портал Telegram-каналида хабар берилди.

Ягона портал Давлат ижтимоий суғурта жамғармаси билан биргаликда янги хизматни ишга туширди.

Хизматдан фойдаланиш учун my.gov.uz порталига кириб, «Ҳомиладорлик ва туғиш бўйича давлат ижтимоий суғуртаси нафақаси маълумотлари» хизматидан фойдаланиш лозим.

Бунда маълумотлар автоматик шаклланади, ортиқча ҳужжат талаб этилмайди. Хизмат орқали иш стажи тўғри ҳисоблангани ҳамда фуқарога қанча маблағ тайинлангани ва тўлов амалга оширилганлик ҳолатини кўриш мумкин.

2026 йилнинг 1 январидан Ўзбекистонда ҳомиладорлик ва туғиш нафақаси проактив шаклда тайинлана бошлади. Ижтимоий суғурта доирасида нафақалар минимал суғурта стажи ва суғурта бадали асосида тайинланади.

1 июлдан вақтинчалик меҳнатга лаёқатсизлик, 2030 йилдан эса ишдан бўшатиш нафақаси ҳам автоматик тарзда белгиланади.