Ўзбекистоннинг барча халқаро аэропортларида чет эл фуқароларига ҚҚСни қайтариш тизими йўлга қўйилади. Бу ҳақда “Чет эл фуқароларига қўшилган қиймат солиғини қайтариш тизимини такомиллаштириш чора-тадбирлари тўғрисида”ги президент қарорида белгиланди.

2023 йил 1 январдан бошлаб чет эл фуқаролари томонидан чакана савдо билан шуғулланувчи субъектлардан айрим турдаги товарларни сотиб олганда қўшилган қиймат солиғи суммасини қайтариш тизими (Тах Free тизими) тажриба тариқасида жорий этилганди. 2026 йил 1 апрелдан республиканинг барча халқаро аэропортларида чет эл фуқароларига ҚҚСни қайтариш тизими йўлга қўйилади. Чет эл фуқароларига уларнинг ихтиёрига асосан ҚҚСни нақд пулда қайтариб олиш имконияти яратилади. Бунда қўшилган қиймат солиғининг белгиланган ставкаси миқдорининг 85 фоизи чет эл фуқаросига қўшилган қиймат солиғи суммасини қайтаришга, 15 фоизи Тах Free тизими операторининг хизматларига йўналтирилади.

ҚҚСни чет эл фуқароларининг банк картасига қайтариш товарлар олиб чиқиб кетилган кундан кейин 3 иш кунидан кўп бўлмаган муддатда амалга оширилади.

Чет эл фуқароларига ҚҚСни қайтаришда минимал харид қиймати ҚҚСни инобатга олган ҳолда 300 минг сўм этиб белгиланади. Тах Free тизими татбиқ этиладиган товарларнинг чегараланган рўйхати (бундан озиқ-овқат маҳсулотлари мустасно) бекор қилинади.

Ҳужжатда қайд этилишича, чет эл фуқароларига ҚҚСни қайтариш тизими қамровини кенгайтириш, 2026–2027 йилларда чет эл фуқаролари томонидан амалга ошириладиган харидлар ҳажмини 10 бараварга ошириш мақсад қилинган.

Тах Free – халқаро ҚҚС қайтариш тизими. Чет элда харидларни амалга оширган саёҳатчилар ташриф буюрган мамлакат фуқаролари эмаслиги сабабли товарлар ва хизматлар нархининг ушбу қисмини тўлашлари шарт эмас. Шу сабабли сайёҳлар чет эл сафарларида харид қилган товарлар учун ҚҚСни қайтариб олишлари мумкин.