«Эл-юрт умиди» стипендиатлари мажбуриятини бажармаган тақдирда маблағлар ундирилади. Бу ҳақда Олий Мажлис Қонунчилик палатасининг навбатдаги мажлисида «Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида»ги қонун лойиҳаси биринчи ўқишда кўриб чиқилди.

Қонун лойиҳасида жамғарма томонидан сарфланган маблағларни ундириш билан боғлиқ масалаларни тартибга солиш таклифи берилди. Жумладан, ушбу маблағларни ундириш юзасидан фуқаролик ишлари бўйича судларга даъво киритишда жамғармани давлат божини тўлашдан озод қилишни назарда тутувчи норма киритилиши таклиф этилди.

Шунингдек, қонун лойиҳасида идоравий норматив-ҳуқуқий ҳужжатлар лойиҳаларини ишлаб чиқиш ва келишиш тартибини соддалаштириш, жараён муддатларини қисқартириш ҳам назарда тутилмоқда. Хусусан, бундай ҳужжатлар лойиҳасининг жамоатчилик муҳокамаси муддатини 10 кун этиб белгилаш таклифи тақдим этилди.

Агар 5 кун ичида таклиф ва мулоҳазалар келиб тушмаса, лойиҳани ҳуқуқий экспертизага киритиш имконияти берилиши кўзда тутилган. Шунингдек, Адлия вазирлиги томонидан ҳуқуқий экспертиза ўтказиш ҳамда давлат рўйхатидан ўтказиш муддатини 20 кунга қисқартириш таклиф қилинди.