Тошкент шаҳридаги уй-жойлар нархини онлайн кузатиш имкони яратилади. Бу ҳақда 5 март куни бўлиб ўтган матбуот анжуманида Урбанизация ва уй-жой бозорини барқарор ривожлантириш миллий қўмитаси раиси Шерзод Кудбиев маълум қилди, дея хабар берди Спот мухбири.

Унинг сўзларига кўра, президент томонидан қўмита ҳузурида Urban Community масъулияти чекланган жамияти шаклида корхона ташкил этиш бўйича топшириқ берилган. У орқали урбанистлар ва экспертлар билан алоҳида учрашувлар ўтказилиб, соҳадаги муаммолар муҳокама қилинади. Қарор қабул қилишда эксперт кенгашининг хулосалари муҳим аҳамиятга эга бўлади.

Кудбиев қўмита қурилиш соҳасидаги муҳим ахборотларни мунтазам равишда етказиб борувчи алоҳида тизим яратишдан манфаатдор бўлишини қайд этди.

Бундан ташқари, Тошкентдаги турар жойларнинг ўртача квадрат метр нархларини туманлар кесимида эълон қилиб бориш кўзда тутилган. Бунинг учун Урбан Cоммунитй томонидан қўмита сайти яратилиб, ишга туширилади. Қўмита раисининг таъкидлашича, бу «тарихда биринчи марта» давлат ташкилоти даражасида нархлар ҳақида маълумот берилиши бўлади.

«Биз халқимиз манфаати учун Тошкент шаҳридаги ўртача квадрат метр нархларни эълон қилиб боришимиз керак. Уйнинг бир квадрат метри қанчага тушяпти, Яккасаройда, Мирзо Улуғбекда, Учтепада ёки Сергелида нархлар қандай бўляпти — одамлар буни билиши керак. Масалан, бир қаватли уйларга инвестиция киритманг, уларнинг қиймати паст бўлади. Агар «снос»га тушса, сизга ана шу қийматда [тўлаб берилади], деб формуласини кўрсатишимиз, бузилишлар қачон, қаерда бўлишини Тошкент шаҳрининг бош планидан кўринг, деб кўпроқ ахборот беришимиз керак», — деди Шерзод Кудбиев.

У журналистнинг «фақат Тошкент шаҳридаги уй-жойлар нархлари эълон қилинадими?», деган саволига «Барча ҳудуд бўйича маълумотларни эълон қилишга ҳаракат қиламиз. Бу Ўзбекистон миллий қўмитаси, фақат Тошкент шаҳриники эмаску», — дея жавоб берди.