Ўзбекистонда 2025 йил IV чорагида бизнес субъектлари 47,8 мингта бўш иш ўринлари эълон қилган. Бу 2024 йил мос даврига нисбатан 6,4 мингтага ёки 15,3 фоизга кўп. Марказий банк таҳлилига кўра, ишчи кучига бўлган талабнинг энг юқори ўсиши қурилиш соҳасида кузатилган — йиллик 32,6 фоиз. Умумий овқатланиш (23,9 фоиз) ва ишлаб чиқариш (13,4 фоиз) йўналишларида ҳам иш таклифи кескин кўпайган.

Ўтган йилнинг октябрь-ноябрь ойларида онлайн иш қидириш фаоллиги мавсумий пасайган. Бутун йил давомида эса иш қидириш фаоллиги барқарор бўлган. Бироқ фаол меҳнат аризалари (резюмелар) сони ўсиши 2024-йилга нисбатан сезиларли даражада паст шаклланган.

Марказий банкка кўра, иш қидириш фаоллиги барқарор бўлиб, таклиф ортгани талабга стимул беради, натижада иқтисодиёт кенгаяди.

“Бу ҳолат қисқа муддатли оралиқда иқтисодий ўсишни қўллаб-қувватлайди. Талабнинг ошиши орқали инфляцион босим сақланиб қолишини кўрсатади”, дейилади шарҳда.

Регулятор 2025 йил IV чорагида ўтказган сўровда 36,4 фоиз корхонада вакантлар кўпайиши кутилаётгани билдирилган. Яна 56,4 фоизи иш ўринлари ўзгармаслигини айтган. Иш ўринлари сонини қисқартиришни кутаётганлар III чоракдаги 12,7 фоиздан IV чоракда 7,2 фоизгача қисқарган.

“Иш ўринлари сонини оширишни режалаштирган тадбиркорлар улуши ўтган йилнинг мос даврига нисбатан сезиларли ўсган. Бунда асосан қурилиш соҳасидаги респондентлардан 43,6 фоизи (2024 йил IV чорагида 35,3 фоиз), хизматлар соҳасидагилар 38,5 фоизи (бир йил олдин 26,7 фоиз) ва савдо соҳасидагилар 32,2 фоизи (бир йил илгари 24,4 фоиз) иш ўринларини оширишини билдирган”, дейилади таҳлилда.

​2025-йилда 725,9 мингта корхона ва ташкилотлар рўйхатдан ўтган. Бу 2024-йилдагидан 5,4 фоизга кўп.