“Очиқ бюджет” порталида “Ташаббусли бюджет” жараёнининг 2026 йилги 1-мавсум ғолиб лойиҳалари эълон қилинди. Бу ҳақда Иқтисодиёт ва молия вазирлиги хабар берди.

Маълум қилинишича, жараёнларда мамлакат бўйлаб жами 10 млн 284 мингта овоз берилди. Овоз бериш жараёни якунларига кўра, жами 1 996 та (1 980 та анъанавий ҳамда 16 та шериклик) лойиҳа ғолиб деб топилди.

Натижалар 21 мартга ўтар кечаси эълон қилинди. Ғолиб бўлган маҳаллалар аҳолиси ғалабани катта тантана сифатида нишонлади. Айрим ҳудудларда мушакбозлик ҳам уюштирилган.

Вазирликнинг эслатишича, овоз йиғишга мажбурлаш ходимларни мажбурий меҳнатга жалб қилиш сифатида таснифланади ҳамда мажбурий овоз тўпланган лойиҳалар овоз бериш босқичидан четлатилади.

Ғолиб бўлган лойиҳалар билан ушбу ҳавола орқали танишиш мумкин.

Эслатиб ўтамиз, “Ташаббусли бюджет”нинг 2026 йилги 1-мавсуми доирасида овоз бериш босқичи 1 мартдан бошланганди. Ушбу мавсум доирасида фуқаролар томонидан жами 21 049 та лойиҳа келиб тушган бўлиб, шулардан 17 390 таси саралаш босқичидан овоз бериш босқичига ўтказилган.