Олтиннинг спот нархлари 8,7% га арзонлаб, бир унция учун энг пастки кўрсаткич — $4099,55 ни ташкил қилди. Қимматбаҳо металл нархи 2025 йил 24 ноябрдан буён илк бор $4100 лик маррадан пасайди. Москва вақти билан соат 10:37 га келиб пасайиш суръати 6,9% гача секинлашди ва олтиннинг спот нархи бир унция учун тахминан $4180 га етди.

Чикаго товар биржасида апрель ойида етказиб бериладиган олтин фьючерслари $4137,8 (-9,55%) қийматида сотилди.

Олтин 2026 йил бошидан буён эришган бутун ўсишини бой берди, унинг қиймати тўққиз кундан бери кетма-кет пасаймоқда, деб ёзади Bloomberg. Агентликнинг таъкидлашича, ўтган ҳафта қимматбаҳо металл учун 1983 йилдан бери энг ёмони бўлди.

АҚШ ва Исроилнинг Эронга қарши операцияси фонида инфляцион хатарлар кучайгани сабабли олтин нархлари пасаймоқда.

Бу АҚШ Федерал захира тизими (ФЗТ) ва дунёнинг бошқа марказий банклари фоиз ставкаларини аввал кутилганидан юқорироқ даражада ушлаб туриши эҳтимолини оширди.

Олтиннинг ўзи инвесторларга фоизли даромад келтирмайди. Бундан ташқари, Bloombergʼнинг қайд этишича, инвесторлар 28 февралдан, яъни Эрон билан уруш бошланганидан буён уч ҳафта давомида бошқа активлар бўйича кўрилган зарарларни қоплаш учун олтинни сотган.

Март ойи бошида АҚШ ва Исроилнинг Эронга қарши зарбалари фонида олтин нархи ошгани ҳақида хабар берилганди. Душанба савдоларида қимматбаҳо металлнинг жаҳон котировкалари 2,50% дан ошди ва бир троя унцияси учун деярли $5400 ни ташкил қилди.

29 январь куни жаҳон бозорида ҳам янги нарх рекорди ўрнатилди — троя унцияси $5559 га ёки бир грамми $178,73 га етганди. Бир кунда қимматбаҳо металл нархи 9,3% га, йиллик ҳисобда эса 80% дан ортиққа қимматлашди. Кумушнинг троя унцияси нархи эса ўтган кунга нисбатан 11,4% га ошиб, $118,3 га кўтарилди.

Февраль ойи бошида JP Morgan 2026 йил охиригача олтин нархини бир унция учун $6300 га кўтарилиши ҳақидаги башоратини оширганди. Бунга марказий банклар ва инвесторларнинг барқарор ва кучайиб бораётган талабига асосланиб, сўнгги кескин нарх ўзгаришлари сабаб бўлган. Қайд этилишича, прогнознинг ошишига асосий сабаб расмий сектор томонидан талабнинг кутилганидан кўра кучлироқ эканлиги ҳисобаланади.