Ўзбекистонда 2026 йил январь-февраль ойларида солиқ ҳуқуқбузарлиги ҳақида хабар берган 6 701 фуқарога 4,3 миллиард сўм мукофот пули тўланди. Бу миқдор ундирилган жарима суммасининг 20 фоизига тенг, дея хабар берди Солиқ қўмитаси.

Мукофот пуллари ўртача ҳисобда ҳар бир хабар берувчига 643,3 минг сўмдан тўғри келади.

Энг кўп пул олганлар Тошкент шаҳрида қайд этилган — 1328 кишига 901 миллиард сўм тўланган. Энг кам мукофотланганлар Жиззах вилоятида бўлиб, 176 киши 110,5 миллиард сўм олган. Қолган ҳудудларда рақамлар қуйидагича:

• Қорақалпоғистон — 314 кишига 192,5 миллиард сўм;
• Андижон вилояти — 509 кишига 325,5 миллиард сўм;
• Бухоро вилояти — 521 кишига 330 миллиард сўм;
• Қашқадарё вилояти — 333 кишига 204,5 миллиард сўм;
• Навоий вилояти — 248 кишига 167 миллиард сўм;
• Наманган вилояти — 375 кишига 238,5 миллиард сўм;
• Самарқанд вилояти — 369 кишига 462,5 миллиард сўм;
• Сурхондарё вилояти — 332 кишига 217,5 миллиард сўм;
• Сирдарё вилояти — 239 кишига 155 миллиард сўм;
• Тошкент вилояти — 673 кишига 396,5 миллиард сўм;
• Фарғона вилояти — 545 кишига 325 миллиард сўм;
• Хоразм вилояти — 469 кишига 285 миллиард сўм.

Икки ой давомида қўмитага мобил илова орқали солиқ ҳуқуқбузарликлари ҳақида 21 минг 964 та мурожаат келиб тушган. Шундан қарийб 18 826 та ёки 85,7 фоиз мурожаат сотувчилар харид чеки бермагани юзасидан бўлган. Яъни жарималарнинг катта қисми тадбиркорлардан чек бермаслик сабабидан ундирилган. Яна 620 та мурожаат тўлов картадан қабул қилинмагани, 35 таси пластик карта учун харид суммасини ошириб айтиш бўйича қилинган.

Мурожаатларнинг 4 890 таси такрорий бўлгани ёки шикоят келиб тушган тадбиркорлик субъектида текширув давом этаётгани сабабли кўриб чиқилмаган. Мурожаатлар асосида 12 216 та сайёр солиқ текшируви ўтказилиб, 99,2 фоиз ҳолатда ҳуқуқбузарлик тасдиқланган.

Маълумот учун, 2025 йил январь-февраль ойларида солиқ ҳуқуқбузарликлари бўйича хабар берганларга 6,9 миллиард сўм мукофот тўланган.