Ўзбекистон Марказий банки шахсни тасдиқловчи ҳужжатни тақдим этмасдан нақд чет эл валютасини сотиб олиш лимитини оширишни режалаштирмоқда. Бу ҳақда регуляторнинг жамоатчилик муҳокамаси учун эълон қилинган қарор лойиҳасида келтирилган.

Ҳужжатга кўра, ушбу чегарани 100 доллардан 500 АҚШ долларигача ошириш таклиф этилмоқда. Шундай қилиб, 500 доллар эквивалентигача бўлган миқдорда нақд чет эл валютасини сотиб олаётганда паспорт талаб этилмаслиги мумкин.

Мижозни тегишли тартибда текшириш чоралари ўз ичига мижознинг шахсини идентификация қилиш ва тасдиқлашни, шунингдек, унинг номидан ҳаракат қилаётган шахснинг шахси ва ваколатларини текширишни қамраб олади.

Банклар бенефициар мулкдорни аниқлаши, ишбилармонлик муносабатлари ёки операцияларнинг мақсади ва хусусиятини ўрганиши ҳамда мижоз операцияларининг унинг профилига мувофиқлигини, жумладан, зарур ҳолларда маблағлар манбасини доимий равишда мониторинг қилиб бориши шарт.

Бундан ташқари, лойиҳада банк ҳисобварағини очмасдан амалга ошириладиган операцияларда тегишли текширувдан ўтказиш (мижозни идентификация қилиш) чегараларини ўзгартириш кўзда тутилган.

Ҳозирги вақтда бундай процедуралар базавий ҳисоблаш миқдорининг 500 бараварига тенг ёки ундан ортиқ (тахминан 206 млн сўм) бўлган суммаларда мажбурий ҳисобланади. Эндиликда ушбу чегарани 175 млн сўм миқдорида қатъий белгилаш таклиф этилмоқда.

Тушунтириш хатида қайд этилишича, ушбу ўзгаришлар аҳоли учун қўшимча қулайликлар яратиш мақсадида киритилмоқда.

Тегишли текширувдан ўтказиш талаб этиладиган чегаравий сумма FATF (Жиноий фаолиятдан олинган даромадларни легаллаштиришга қарши курашиш бўйича молиявий чоралар кўриш гуруҳи)нинг 10-тавсияси талабларига мувофиқлаштирилмоқда.

Ушбу талабларга кўра, бир марталик операциялар бўйича тегишли текширув учун чегара миқдори 15 минг АҚШ долларини ташкил этади (FATF тавсиялари).

Бугунги кунда қоидалар билан белгиланган базавий ҳисоблаш миқдорининг 500 баравари (тахминан 16,9 минг доллар) 15 минг доллардан ошади.

Шу муносабат билан, чегаравий сумма 175 млн сўм этиб белгиланмоқда.