Марказий банк P2P ўтказмаларининг мақсадини мажбурий кўрсатиш тартибини бекор қилди. Мазкур маълумотни банк соҳасидаги иккита манбасига таяниб, Спот нашри хабар берди. Марказий банк матбуот котиби ҳозирча «Kommers.uz»нинг бу борадаги сўровига жавоб қайтармади.

Март ойи бошида бир нечта финтех-хизматлар фойдаланувчилар учун карталар ўртасида пул ўтказмаларининг мақсадини кўрсатиш талабини жорий этганди. 17 февраль куни Марказий банк банклар ва тўлов ташкилотларига P2P ўтказмалар учун мақсадлар рўйхатини қўшиш бўйича кўрсатма юборган эди. Улардан иловалардаги P2P ўтказмалар интерфейсига тўлдирилиши мажбурий бўлган мақсад майдонини қўшиш сўралган.

Ҳужжатга 16 банддан иборат қуйидаги жадвал илова қилинган:

1. товарлар ёки савдо учун тўлов;
2. овқатланиш ва таом харажатлари;
3. қарзни қайтариш;
4. ёрдам пули;
5. оиласига ёки қариндошларига ўтказма;
6. совға;
7. етказиб бериш ҳақи;
8. ижара тўлови;
9. коммунал тўловлар;
10. сафар харажатлари;
11. таълим харажатлари;
12. тиббий харажатлар;
13. хайрия;
14. «миннатдорчилик учун» тўлов (чой пули);
15. ўйин-кулги харажатлари;
16. инвестиция ўтказмалари.

Марказий банк кўрсатманинг бажарилиши тўғрисидаги ҳисоботни «скриншот илова қилинган ҳолда» ўзининг Тўлов тизимлари департаментига тақдим этишнинг охирги муддатини 1 март этиб белгилаган.

Марказий банкнинг позицияси

Орадан бир неча кун ўтгач, Марказий банк ушбу кўрсатма президентнинг 2025 йил 10 декабрдаги нақд пульсиз ҳисоб-китобларни оммалаштириш ва яширин иқтисодиётни қисқартириш тўғрисидаги фармони ижросига қаратилганини маълум қилди.

Шунингдек, МБ банклар ва сервисларга янги функцияни амалга ошириш юзасидан ўз таклиф ва мулоҳазаларини Тўлов тизимлари департаментига тақдим этишни таклиф қилди. Регулятор уни «индивидуал техник ечимлар ва мобил қурилмаларнинг имкониятлари, уларнинг архитектураси, интерфейс қулайлиги, шунингдек, ҳар бир банк иловасининг ўзига хос хусусиятларини» ҳисобга олган ҳолда такомиллаштиришни режалаштирмоқда.

«Рақамли хизматлар қулайлигини ошириш» мақсадида банклар ва тўлов сервислари янги функцияни ихтиёрий равишда жорий этиши, P2P ўтказмалари мақсадлари рўйхатига қўшимча вариантлар қўшиши ёки кераксизларини олиб ташлаши мумкин.

Рўйхатни ўзгартириш сервиснинг ички сиёсати ва техник имкониятларига асосланиши мумкин. P2P ўтказмалари мақсадларини кўрсатишнинг такомиллаштирилган механизми ишлаб чиқиш якунлангач, «алоҳида тартибда» қўшимча равишда тақдим этилади.

Марказий банк янгиликнинг асосий мақсади «онлайн-платформалар ўртасида соғлом рақобатни ривожлантириш ва нақд пульсиз тўловларни кенгайтириш» эканини қайд этди. Регулятор унинг ёрдамида банклар ва тўлов сервислари мижозларга янги хизматларни таклиф қила олишидан умидвор.