Марказий банк ноқонуний фаолиятдан олинган даромадларни легаллаштиришга қарши курашиш бўйича Ички назорат қоидаларига ўзгартиришлар лойиҳасини ишлаб чиқди. Ҳужжат, шунингдек, пул ўтказмалари ва бошқа банк операциялари устидан назоратни кучайтиришга қаратилган бир қатор чора-тадбирларни ўз ичига олади.

Марказий банк лойиҳага тушунтириш хатида ташаббусларни Жиноий даромадларни легаллаштиришга қарши курашиш бўйича молиявий чора-тадбирларни ишлаб чиқиш гуруҳи (FATF) тавсиялари билан изоҳлайди.

Шундай қилиб, транзакция тўғрисидаги хабарга илова қилиниши керак бўлган жўнатувчилар ва қабул қилувчилар тўғрисидаги маълумотлар рўйхати аниқлаштирилмоқда:

• жўнатувчилар учун — операция рақами, яшаш манзили ва туғилган санаси (жисмоний шахслар учун) ёки СТИР (юридик шахслар учун);
• олувчилар учун — операция рақами, жойлашган мамлакат ёки шаҳар, шунингдек СТИР (юридик шахслар учун).

Ушбу маълумотлар БҲМнинг 25 баравари (10,3 млн сўм) ва ундан ортиқ миқдордаги барча ички тўловлар ва ўтказмаларга илова қилиниши керак. Ҳозирги таҳрирда талаб фақат БҲМнинг 30 бараваридан (12,6 млн сўм) бошлаб электрон пул ўтказмалари учун амал қилади.

Тижорат банклари товар ва хизматлар учун барча тўловларга банк карталари рақамларини илова қилишлари керак бўлади. Сўров бўйича карта эмитент-банки ва сотувчининг хизмат кўрсатувчи банки тўғрисидаги маълумотларни тақдим этишни мажбурий қилиш режалаштирилмоқда.

Шунингдек, карта рақами бошқа кредит муассасаси орқали (масалан, хорижий банкнинг банкоматида) трансчегаравий нақд пул ечиб олиш тўғрисидаги сўровларга ҳам илова қилиниши керак. Экваер банкнинг сўровига кўра, улар 3 иш куни ичида мижоз тўғрисидаги маълумотларни юборишлари керак бўлади.

Шу билан бирга, битта молия муассасаси номига бир нечта тўловни ўз ичига олган транзакция — яъни, пакетли ўтказма тушунчаси жорий этилмоқда. У бир ёки бир нечта олувчига мўлжалланган бўлиши мумкин.

Пакетли ўтказма ҳолатида банклар ҳар бир тўловга жўнатувчи тўғрисидаги маълумотларни, агар улар ўтказманинг ўзида мавжуд бўлса, илова қилишлари шарт эмас. Бунда пакетли ўтказма ноёб ҳисоб рақами ёки операцияни, шунингдек, олувчи ҳақидаги тўлиқ маълумотларни ўз ичига олиши керак.

Лойиҳа бўйича изоҳлар Норматив-ҳуқуқий ҳужжатлар лойиҳалари муҳокамаси порталида 4 апрелгача қабул қилинади.