Ўзбекистонда суд ҳужжатлари ва бошқа органлар ҳужжатлари ижросини таъминлаш жараёнларига сунъий интеллект технологиялари жорий этилади. Бу бўйича президент фармони қабул қилинди.

Ҳужжатга кўра, 2027 йилдан давлат ижрочилари томонидан қабул қилинадиган қарорларнинг камида 70%и сунъий интеллект ва ахборот тизимлари орқали автоматлаштирилади.

Шунингдек, ижро иш юритуви жараёнлари тўлиқ электрон шаклга ўтказилиб, ижро ҳаракатлари давомида ундирилган маблағларни тақсимлаш ҳам рақамлаштирилади.

2026 йил 1 июлдан бошлаб суд ва бошқа органлар ҳужжатлари асосида давлат даромадига ўтказиладиган автотранспорт воситалари ва кўчмас мулклар давлат ижрочисининг қарорига асосан тўғридан-тўғри Давактив тасарруфига ўтказилади.

Фармонга кўра, солиқ қарзи ва муаммоли кредитларни ундиришда янги ёндашув жорий этилади.

Хусусан, ижро ҳужжатлари бўйича мол-мулкни ундирувчи томонидан расмийлаштирилган процессуал ҳужжатлар асосида давлат ижрочиси қарори билан онлайн аукцион савдолари орқали реализация қилиш имконияти яратилади.

Юридик шахсларнинг мол-мулкини хатлаш ва кўздан кечириш билан боғлиқ ҳужжатлар белгиланган тартибда расмийлаштирилади.

Солиқ қарзини ундириш ҳолатларида бу ишлар солиқ органининг мансабдор шахси томонидан, гаров билан таъминланган мажбуриятлар бўйича эса давлат ижрочиси топшириғига асосан тижорат банкининг ваколатли шахси томонидан амалга оширилади.

Ижро ҳужжатлари бўйича савдоларни ташкил этишга оид барча ҳужжатлар (гаров, хатлов ва кўздан кечириш далолатномалари ва бошқалар) электрон платформалар орқали юборилади ва бутун жараён рақамлаштирилади.

Шу билан бирга, хатлаш ва кўздан кечириш асосида реализация қилинган ёки таклиф этилган мол-мулкларни расмийлаштириш билан боғлиқ хатарлар рўйхатдан ўтказувчи идоралар зиммасига юкланади.

Ўтган йилнинг августида қабул қилинган президент фармони билан суд ишларида сунъий интеллект технологиялари жорий этилиши белгиланганди. Бунда судга ариза беришдан олдин сунъий интеллект ёрдамида суд муҳокамасининг тахминий натижаси шакллантирилади.