Ўзбекистон 2026 йил 1 апрель куни 1 миллиард АҚШ доллари эквивалентидаги миллий валютадаги суверен халқаро облигацияларни 12,25 фоиз ставкада жойлаштирди. Бу мамлакат тарихида ушбу турдаги облигациялар учун энг паст фоиз даражаси бўлди. Бу ҳақда Иқтисодиёт ва молия вазирлиги хабар берди.

Маълум қилинишича, мазкур облигациялар 3 йил муддатга чиқарилган бўлиб, аввалги йилларга нисбатан фоиз ставкаси сезиларли даражада пасайган. Хусусан, 2024 йилда бу кўрсаткич 16,625 фоизни, 2025 йилда эса 15,5 фоизни ташкил этган эди. Янги эмиссия бўйича фоизнинг пасайиши Ўзбекистоннинг молиявий бозорлардаги ишончи ортаётганини кўрсатади.

1 апрель куни АҚШ, Европа, Буюк Британия, Осиё ва Яқин Шарқдан 32 та йирик инвестор иштирокида ўтказилган аудиоконференсияда “Ўзбекистон-2030” стратегияси, иқтисодий ислоҳотлар ва макроиқтисодий кўрсаткичлар тақдим этилди. Инвесторлар мамлакатдаги барқарорлик ва изчил ислоҳотларни ижобий баҳолаган.

Кун давомида сўмдаги облигацияларни харид қилиш учун 50 га яқин хорижий инвестор томонидан жами 23,4 триллион сўмлик буюртмалар келиб тушди. Бу дастлабки таклифдан қарийб 4 баравар юқори бўлиб, юқори қизиқиш натижасида 12,2 триллион сўмлик облигациялар 12,25 фоиз ставкада жойлаштирилди.

Қайд этилишича, ушбу эмиссия Марказий ва Шарқий Европа, Яқин Шарқ ва Африка минтақасида сўнгги 15 йил ичидаги миллий валютадаги энг йирик транзаксиялардан бири бўлди. Шунингдек, облигацияларни “GBI-EM” индексига киритиш масаласи кўриб чиқилмоқда, бу эса янги инвесторларни жалб қилиш ва келгусида фоиз ставкаларини янада пасайтириш имконини беради.

Мазкур облигацияларни жойлаштиришдан тушган маблағлар 2026 йилги давлат бюджети тақчиллигини молиялаштиришга йўналтирилади.