Адлия вазирлиги Капитал бозори соҳасида “Тартибга солиш қумдони” махсус ҳуқуқий режимини тақдим этиш тартиби тўғрисидаги низомга ўзгартириш ва қўшимчалар киритиш тўғрисидаги идоравий ҳужжатни давлат рўйхатидан ўтказди.

Хусусан, тан олинган хорижий юрисдикциядаги норезидент юридик шахслар билан биргаликда Ўзбекистон резидентлари ҳам капитал бозори соҳасидаги “Тартибга солиш қумдони” махсус ҳуқуқий режими иштирокчиси бўлиши мумкин.

Махсус ҳуқуқий режим чекланмаган муддатга амал қилиши белгиланди.

Капитал бозори соҳасида илгари қонунбузарликлар содир этилган бўлса ва ваколатли органнинг “асослантирилган мулоҳазаси” аризачини махсус ҳуқуқий режимда рўйхатдан ўтказишни рад этиш асосларидан ҳисобланиши қайд этилди.

Шунингдек, 2 ой давомида ҳисобот тақдим этмаслик, махсус ҳуқуқий режим талабларини бузиш ва ваколатли органнинг “асослантирилган мулоҳазаси” махсус ҳуқуқий режим иштирокчиси мақомини бекор қилиш учун асос бўлади.

Маълумот учун, асослантирилган мулоҳаза қонунчиликда белгиланган талабларга қўшимча равишда ваколатли орган томонидан қўлланиладиган, кўриб чиқилаётган масаланинг ҳақиқий мазмуни расмий мазмунидан устуворлигини назарда тутувчи профессионал баҳолаш ҳисобланади.