Ўзбекистонда 2026-йилнинг ўтган даврида тадбиркорларга тўлаган қўшилган қиймат солиқларининг 32,3 миллиард сўми қайтарилди. Бу ҳақда Солиқ қўмитаси хабар берди.

Давлат бизнесга солиқ юкини камайтириш учун ҚҚСнинг бир қисмини кешбэк сифатида қайтаради. Жумладан, 6 апрелгача бўлган даврда 587 та умумий овқатланиш корхонасига тўлаган ҚҚСнинг 25,6 млрд сўм қисми қайтариб берилган.

Яна 15 та туроператор ҚҚС тўловидан 273,1 млн сўм, 99 та меҳмонхона 1,6 млрд сўм, 28 та чорвачилик ва паррандачилик хўжаликлари 1,1 млрд сўм қайтиб олган. Ўз навбатида 111 та заргарлик корхоналарига 3,7 млрд сўм ҚҚС қайтарилган.

Ўтган 2025 йил давомида (23 декабргача) 71,8 млрд сўмлик ҚҚС тушумлари туризм, умумий овқатланиш ва айрим қишлоқ хўжалиги корхоналарига қайтарилганди. Шундан энг йирик маблағ 691 та умумий овқатланиш корхонасига (52,9 млрд сўм) қайтарилган.

Маълумот учун, 2025 йил 1 январдан мамлакатда умумий овқатланиш корхоналарига ҚҚСнинг 40 фоизгача бўлган қисми кешбэк сифатида қайтариб берилмоқда. Бунда ойлик айланмасининг 60 фоизини нақд пулсиз амалга оширган корхоналарга ҚҚСнинг 40 фоизи тўланган заҳоти қайтарилади. Агар нақд пулсиз айланма 60 фоиздан кам бўлса, кешбэк 20 фоиз бўлади.

Меҳмонхона ва туроператорларга эса 2025 йил 1 октябрдан бошлаб тўланган ҚҚСнинг 20 фоизи кешбэк қилиб берилмоқда.