2026 йил 1 апрел ҳолатига, Ўзбекистоннинг олтин-валюта захиралари 68,99 млрд долларни ташкил қилди. Захиралар қиймати март ойида 8,09 млрд долларга қисқарди. Бу ҳақда Марказий банк тақдим қилган ҳисоботда келтириб ўтилган.

Ўтган ой давомида захираларнинг валюта қисми 1,26 млрд долларга, олтин қисмининг қиймати 6,82 млрд долларга камайди. Ўз навбатида захиралар таркибида олтиннинг физик ҳажми 13,1 млн троя унциядан 13,4 млн троя унцияга ошган.

Регулятор инвестиция киритган қимматли қоғозлар портфели эса деярли ўзгаришсиз қолиб, 1,5 млрд доллар атрофида сақланиб қолди.

Умуман олганда, кетма-кет 7 ойдан бери Ўзбекистоннинг захира активларида ўсиш кузатилаётганди. Бу халқаро бозорда олтин нархларининг қимматлашиши фонида юз берди. Яқин Шарқда геосиёсий вазиятнинг ниҳоятда кескинлашиши, жаҳон савдосидаги ноаниқликлар, АҚШ Федерал резерв тизимининг мустақиллиги атрофидаги хавотирлар ва Қўшма Штатларнинг фискал барқарорлигига доир шубҳалар кучайгани сабаб 2026 йилда қимматбаҳо металл баҳоси 5000 доллардан ошиб кетганди.

Бироқ, март ойида қимматбаҳо металл нархи пасая бошлади: агар 2 март куни олтиннинг бир троя унцияси 5419 долларгача кўтарилган бўлса, 1 апрелда ўртача нархлар 4785 долларни ташкил этди.