Ўзбекистон аҳолисининг асосий даромад манбаи ойлик иш ҳақи бўлиб қолмоқда. Бу ҳақда Марказий банк маълумот берди.

Асосий пул ойликдан келади

2026 йил январда аҳолининг истеъмол кайфиятини баҳолаш мақсадида сўров ўтказилди. Жараёнда иштирокчилардан 67 фоизи асосий даромад манбайи ойлик иш ҳақи эканини билдирган.

Қолган қатнашчилар даромад манбалари томорқа, ёлланиб ишлаш, тадбиркорлик, стипендия, нафақа ва мигрант қариндошлари юборган пуллардан келишини таъкидлаган. Дивиденд ва депозит орқали даромад олувчилар энг кам улушни ташкил этган.

Даромад ошишини кутаётганлар кўп

Сўров иштирокчиларидан 67 фоизи келгусида даромадлари ошишини кутаётганини қайд этган. Яна 25 фоизи даромади ўзгармаслигини, 8 фоизи эса камайиши мумкинлигини таъкидлаган.

Ойига 7-10 миллион сўм топадиганлар келгусида даромадлари ошишига ишончи юқорилигини билдирган. Ҳар ой 3 миллион сўмгача, 10-15 миллион сўм оралиғида ва 20 миллион сўмдан кўп топадиганлар эса даромади ўзгармаслиги мумкинлигини айтган.

Маиший хизмат, IT, ОАВ, қишлоқ хўжалиги, савдо, давлат бошқаруви ва умумий овқатланиш соҳасидагилар иш ҳақи ошишига кўпроқ ишонч билдирган. Фан, таълим, коммунал хизматлар ва қурилиш вакилларида эса кутилмалар даражаси пастроқ.

Нималарга кўпроқ харажат қилиняпти?

Сўровда қатнашганларнинг 76 фоизи келгусида харажатлари ошишини тахмин қилган.

Энг юқори ва кам даромад олувчилар келгуси ойларда харажатлари камайишини таъкидлаган. Ўрта (5-7 миллион сўмгача ва 7-10 миллион сўмгача) ва нисбатан юқори (10-15 миллион сўмгача ва 15-20 миллион сўмгача) даромад олувчилар келгусида харажатлари ошишини кутмоқда.

Сўров иштирокчиларидан асосий қисми уй-жой таъмири ва таълим учун энг кўп харажат қилаётганини билдирган. Бунда нисбатан камроқ даромадлилар (5 млн сўмгача) асосий эътиборни уй таъмири ва таълимга қаратган. Юқори даромадлилар эса (20 миллион сўмдан ортиқ) кўпроқ автомобиль, уй сотиб олиш ва саёҳат қилишни режалаштирган.

Марказий банкка кўра, таълим барча учун энг асосий харажат йўналишларидан бири бўлиб қолмоқда. Хусусан, даромади пастроқ қатлам ҳам таълимга кўпроқ харажат қилаётгани қайд этилган.

Сўровда 30 ёшгача бўлганлар таълим ва уй-жой таъмирига кўп пул сарфлашини қайд этган. 31-50 ёшлилар уй-жой таъмири, фарзандлар таълими, даволаниш ва оилавий байрамларга кўп чиқим қилади. 51 ёшдан ошганлар эса соғлиғини тиклаш ва тўй маросимлари учун кўпроқ маблағ сарфлайди.

Марказий банк сўров натижасидан келиб чиқиб, келгуси ойларда аҳоли уй таъмирлаш, таълим, даволаниш, автомобиль хариди ва оилавий тадбирларни ўтказишга кўпроқ харажат қилиши мумкинлигини билдирган.