Ўзбекистонда пул жамғармайдиган аҳоли улуши кўпайди. Бу Марказий банкнинг 2025 йил IV чораги бўйича ўтказган сўровида аниқланди.

Сўровда бир неча кўрсаткичлар қаторида аҳолининг қарз олиш ва пул жамғаришга бўлган мойиллиги ўрганилган. Иштирокчиларнинг қарийб 40,4 фоизи жамғармаси йўқлигини маълум қилган. 2025 йил III чорагида бу кўрсаткич 38 фоизни ташкил этганди. Яъни пул жамғармаётганлар улуши уч ойда 2,4 фоизга кўпайган.

Қатнашчилардан 34,1 фоизи бир ойгача бўлган қисқа муддатли жамғармага эгалигини билдирган. Аниқланишича, 3-6 ойгача етарли жамғармаси борлар улуши бир оз кўпайган. Яна 1-3 ой оралиғида ва 6 ойдан ортиқ муддатга етарли жамғармаси борлар улуши ўтган чоракка нисбатан камайган.

Сўров иштирокчиларидан 62,6 фоизи келажакда тўплаётган пуллари кўпайишига ишонч билдирган. Яна 24,2 фоиз қатнашчи жамғармалари миқдори ўзгаришсиз қолиши мумкинлигини қайд этган. Қолган 13,2 фоиз респондент жамғармалари камайишини кутаётганини таъкидлаган.

Марказий банк аҳолидан қарз олишга мойиллик бўйича ҳам жавоблар олган. Сўров қатнашчиларининг ярмидан кўп қисми (54 фоиз) келаси 12 ой ичида банкдан кредит олишга эҳтиёжи борлигини билдирган. Бу аввалги чоракка нисбатан бир оз юқори кўрсаткич экани очиқланган.

“Кредитга бўлган энг юқори талаб 7-10 миллион сўм даромадлилар гуруҳида кутилмоқда. Аксинча, даромади 20 миллион сўмдан юқори бўлган респондентлар орасида кредит олиш талабида бир оз пасайиш тенденцияси намоён бўлмоқда”, дейилади таҳлилда.

Қатнашчилар банкдан олган қарзларининг асосий қисмини уй-жой таъмири, таълим ва автомобил хариди учун сарфламоқчи эканини билдирган.