Инфляцион кутилмаларнинг пасайиш суръатлари секинлашмоқда

Мартда аҳоли ва тадбиркорларнинг йиллик инфляцион кутилмалари мос равишда 11 фоиз ва 10,7 фоизгача пасайди. Асосий хавотирлар ҳали ҳам коммунал хизматлар ва ёқилғи-энергия нархларининг ўсиши билан боғлиқ.

Март ойида Ўзбекистонда аҳолининг йиллик инфляцион кутилмалари ўтган ойга нисбатан бироз пасайиб, 11,0 фоизни ташкил этди. Бу Ўзбекистон Марказий банкининг аҳоли ва тадбиркорлар орасида ўтказган анъанавий сўровномаси натижаларидан келиб чиқади.

Қайд этиш жоизки, сўнгги ойларда инфляцион кутилмаларнинг пасайиш суръатлари нисбатан секинлашган.

МБ шарҳига кўра, март ойида аҳоли орасида нархларга босим ўтказиши мумкин бўлган асосий омиллар сифатида коммунал хизматлар ва ёқилғи-энергия ресурслари қимматлашишини қайд этган респондентлар улуши бироз кўпайди. Бошқа омиллар бўйича сезиларли ўзгариш қайд этилмади.

Аҳоли ва тадбиркорлик субъектлари орасида 2025 йил давомида юқори даражада сақланиб қолган коммунал хизматлар ва ёқилғи-энергия нархларининг ошиши билан боғлиқ хавотирлар сўнгги ойларда нисбатан мўтадиллашди, лекин бу омилларни инфляцияни кучайтирувчи асосий омил сифатида кўрсатган респондентлар улуши ҳали ҳам энг юқорилигича қолмоқда.

Март ойида тадбиркорлик субъектларининг инфляцион кутилмалари ўтган ойга нисбатан 0,1 фоиз бандга — 10,7 фоизгача пасайди. Тадбиркорлик субъектларининг инфляцион кутилмалари шаклланишида коммунал хизматлар ва ёқилғи-энергия нархлари, шунингдек, транспорт харажатларининг қимматлашиши асосий рол ўйнамоқда. Айни пайтда, тадбиркорлар орасида валюта курси ўзгаришидан хавотир билдирган респондентлар улуши сезиларли камайган. инфляцион кутилмалар, инфляция, марказий банк

Тадбиркорлар инфляцион кутилмаларининг омиллари. Манба: Ўзбекистон Марказий банки шарҳи.

Аҳолининг турли тоифалари кесимида энг юқори инфляцион кутилмалар ишлаб чиқариш соҳаси вакиллари томонидан билдирилган бўлса, энг паст кутилмалар талабалар томонидан қайд этилган.

инфляцион кутилмалар, инфляция, марказий банк

Инфляцион кутилмалар соҳалар кесимида. Манба: Ўзбекистон Марказий банки шарҳи.

Тадбиркорлар орасида келгусида нархлар шаклланиши бўйича энг юқори кутилмалар туризм, ахборот технологиялари ва ОАВ ҳамда таълим соҳасида фаолият юритувчи тадбиркорлар томонидан қайд этилган. Энг паст кутилмалар кафе-ресторан хизматлари ҳамда ҳунармандчилик соҳаларида кузатилган.

Ҳудудлар кесимида аҳоли ва тадбиркорлик субъектлари инфляцион кутилмаларининг энг юқори кўрсаткичи Тошкент шаҳрида қайд этилган. Аҳолининг энг паст инфляцион кутилмалари Самарқанд вилоятида, тадбиркорлик субъектларининг энг паст кутилмалари Навоий вилоятида кузатилган.

Koʻrishlar soni: 12