Вазирлар Маҳкамаси қарори (175-сон) билан Ҳукуматнинг айрим қарорларига ўзгартириш ва қўшимчалар киритилди.

Унга кўра, таълим ташкилотида меҳнат шартномаси асосида таълим ва тарбия соҳасида касбий фаолиятни амалга оширувчи педагоглар учун айрим давлат хизматлари нархи хизматлар умумий қийматининг 50% ини ташкил қилиши белгиланди.

Ушбу енгиллик қуйидаги давлат хизматлари учун татбиқ этилади:

• кўчмас мулк объектларининг давлат кадастри;
• муҳандислик-коммуникация тармоқларига уланиш;
• умумтаълим фанларини билиш даражасини аниқлаш ва сертификат бериш;
• тракторчи-машинист гувоҳномасини олиш учун имтиҳон топширишга рухсат бериш;
• расмий ҳужжатларга апостил қўйиш бўйича давлат хизматлари ва бошқалар.

Шунингдек, ихтисослаштирилган мактаблар ва мактаб-интернатлар директор ва директор ўринбосарлари 5 йилда 1 маротаба ишдан ажралган ҳолда, Маданият вазирлиги томонидан ташкил қилинадиган менежерлик ўқув курсларида ўқитилади.

Бундан ташқари, ихтисослаштирилган мактаб ва мактаб-интернатлардаги ўқувчиларни ўқишдан четлаштириш, бошқа йўналишга ўтказиш ва ўқувчилар ўқишини кўчириш тартиби белгиланди.