Жорий йилнинг 19 февраль куни ҳукумат томонидан “Уй-жой сотиб олиш учун олий малака тоифасига (бош ўқитувчи лавозимига) эга бўлган педагогларга субсидия ажратиш тартиби тўғрисида”ги низом тасдиқланганди. Ана шу низомга мувофиқ ипотека кредити бўйича бошланғич бадалнинг 25 фоиз қисми давлат бюджетидан қоплаб берилади.

Масалан, олий тоифали ўқитувчи 400 млн сўмлик уй сотиб олмоқчи. Банк қоидасига кўра, бошланғич бадал 15% ни ташкил этади, яъни 60 млн сўм. Давлат мана шу 60 млн сўмнинг 25 фоизини тўлаб беради. Натижада ўқитувчи ўз чўнтагидан 60 млн эмас, 45 млн сўм тўлайди. Қолган 15 млн сўм бюджетдан қопланади.

Субсидия кимларга берилади?

Субсидия олишга ариза топшириш учун ўқитувчи қуйидаги талабларга мос келиши керак:

• 60 ёшдан ошмаган бўлиши;
• умумий педагогик иш стажи 15 йилдан кам бўлмаслиги (узлуксиз бўлиши шарт эмас);
• ариза топшириш вақтида таълим муассасасида фаолият юритаётган бўлиши;
• ўзи ва турмуш ўртоғи номида 2 та ва ундан ортиқ уй-жой бўлмаслиги;
• банк олдидаги қарздорлик тарихи ижобий бўлиши зарур.

Аризани қандай топшириш мумкин?

Субсидия олиш учун қуйидаги усуллар орқали ариза топшириш мумкин:

• Давлат хизматлари марказларига бевосита мурожаат қилиш;
• MyGov мобил иловаси орқали;
• my.gov.uz портали орқали.

Қуйида my.gov.uz портал орқали ариза топширишнинг тартиби кўрсатилган.

Ушбу ҳавола орқали my.gov.uz порталига ўтинг.

Ариза тури деган бўлимда “Янги ариза юбориш” деган жойни белгиланг.

Кейин Оилавий ҳолати бўлимида ўзингизга мос жавобни белгилайсиз.

Сўнгра “Кредит тарихини олишга чекловлар мавжуд эмаслигини тасдиқлайман” ҳамда “OneID тизимида шахсга доир маълумотларни бошқариш бўйича чекловлар мавжуд эмаслигини тасдиқлайман” деган ёзувлар олдига тасдиқлаш белгисини қўйинг.

Хизматдан фойдаланиш жараёнида сизнинг маълумотларингиз банклар томонидан текширилади. Юборилган аризага рад жавобини олдини олиш мақсадида OneID тизимида чеклов ҳамда Кредит тарихи учун чеклов бор-йўқлигини аввалдан текшириш керак.

Бунинг учун “OneID тизимида чеклов” ёнидаги “Текшириш” тугмасини босиб, ҳавола орқали ўтинг. Сўнгра хизматни фаоллаштиринг.

Худди шундай “Кредит тарихи учун чеклов” ёнидаги “Текшириш” тугмасини босиб, ҳавола орқали ўтинг. Очилган ойначада “Кредит тарихига киришни чеклаш хизматини ўчириш”ни белгилаш зарур.

Ариза қачон рад этилиши мумкин?

Агар субсидия учун берилган аризадаги маълумотлар нотўғри бўлса, аризачининг кредит тарихи ёмон бўлса ёки аввал бошқа субсидия дастурларидан фойдаланган бўлса, ариза рад этилиши мумкин.

Субсидия бир оилага (эр ёки хотиндан бирига) фақат бир марта берилади ҳамда фақат бирламчи уй-жой бозорида амал қилади.

2026 йилда ушбу мақсадлар учун давлат бюджетидан 200 миллиард сўмгача маблағ йўналтирилиши белгиланган.