Тошкент шаҳрида кўп қаватли уй-жойларга инвестицияларнинг даромадлилиги 2026 йил март ойида 14,6 фоизни ташкил этди. Бу ҳақда Вазирлар Маҳкамаси ҳузуридаги Макроиқтисодий ва ҳудудий тадқиқотлар институти хабар берди.

МҲТИ таҳлилига кўра, ўтган йилнинг мос даврида бу кўрсаткич 6,2 фоиз бўлган. Шу билан бирга, ижарадан олинадиган ўртача даромад 8,7 фоиздан 8,0 фоизгача пасайган бўлса, уй-жойларнинг ўртача нархи 6,6 фоизга ошган. Мутахассислар уй-жой инвестицияси даромадлилиги ҳудуд ва хоналар сонига қараб сезиларли даражада фарқланишини қайд этди.

Хусусан, 1 хонали уйлар бўйича энг юқори даромадлилик Миробод туманида 50,0 фоизни ташкил қилган, Бектемирда эса 19,3 фоиз қайд этилган. 2 хонали уйлар орасида Юнусободда 24,8 фоиз, Яккасаройда 13,0 фоиз даромадлилик кузатилган. 3 хонали уйлар бўйича Мирободда 12,9 фоиз, Чилонзорда 3,8 фоиз бўлган бўлса, 4 хонали уйлар сегментида Яккасаройда 18,5 фоиз даромад қайд этилган, Бектемирда эса -14,1 фоиз пасайиш кузатилган.

Сўнгги бир йилда уй-жой даромадлилиги туманлар кесимида кескин фарқлана бошлаган. Даромадлиликнинг ўртачадан оғиши 2,8 фоиздан 5,5 фоизгача етгани уй-жой нархларидаги тафовут ортаётганини кўрсатади. Шу билан бирга, ижара нархлари бўйича фарқ унчалик катта эмас — 0,4 фоиздан 0,6 фоизгача.

Уй-жой нархи ўсишидан олинадиган даромад ҳам сезиларли бўлган. Масалан, 2025 йил март ойида уй сотиб олиб, 2026 йил мартда сотган инвесторлар ўртача 6,6 фоиз даромад олган. Энг юқори ўсиш Миробод (16,6 фоиз) ва Яккасарой (12,4 фоиз) туманларида кузатилган, айрим ҳудудларда эса паст ёки манфий кўрсаткичлар қайд этилган.

Ижара даромадлилиги эса бир оз пасайган. 2026 йил март ойида ўртача ижара даромадлилиги 8,0 фоизни ташкил этиб, ўтган йилга нисбатан 0,7 фоизга камайган. Энг юқори кўрсаткич Шайхонтоҳур (9,1 фоиз) ва Яшнобод (8,4 фоиз) туманларида қайд этилган.

Таҳлилга кўра, инвестиция нуқтайи назаридан энг жозибадор сегмент 1 ва 2 хонали уйлар бўлиб қолмоқда. Уларнинг даромадлилиги мос равишда 29,8 фоиз ва 17,4 фоизни ташкил этган. 3 ва 4 хонали уйлар бўйича эса даромадлилик пастроқ — 8,7 фоиз ва 2,4 фоиз даражасида.

Банк депозитлари билан солиштирганда, уй-жой инвестициясининг даромадлилиги чет эл валютасидаги депозитлардан юқори, бироқ миллий валютадаги депозитлар (ўртача 21,2 фоиз) ҳали ҳам юқори даромадлиликни сақлаб қолмоқда.