2026 йилнинг январь-март ойларида Ўзбекистонга пул ўтказмалари ҳажми ўсишда давом этиб, 3,79 млрд долларга етди. Бу Марказий банк шарҳидан келиб чиқади.

Бу 2025 йилнинг мос даврига (3,36 млрд доллар) нисбатан 13 фоизга ёки 433 млн долларга кўп демакдир. 2024 йилда эса бу кўрсаткич 2,5 млрд долларни ташкил этган эди.

Анъанага кўра, энг катта ҳажмдаги маблағлар март ойига тўғри келди:

• январь: 1,23 млрд доллар;
• февраль: 1,23 млрд доллар;
• март: 1,33 млрд доллар.

2026 йилнинг март ойида ўтказмалар ҳажми 2025 йилнинг мартига (1,22 млрд доллар) нисбатан қарийб 10 фоизга, 2024 йилнинг мартига (963 млн доллар) нисбатан эса 38 фоизга ошди.

Бундан ташқари, халқаро пул ўтказмалари орқали Ўзбекистондан 604 млн доллар чиқиб кетган бўлиб, бу ўтган йилнинг биринчи чорагига нисбатан 39 млн долларга камдир.

Январь-март ойларида Ўзбекистонда чет эл валютаси таклифининг ўсиши асосан экспорт тушумлари, банкларнинг ташқи қарзлари ва халқаро пул ўтказмалари ҳисобига таъминланди. Шу билан бирга, аҳоли томонидан валюта сотувининг ўсиши алоҳида аҳамият касб этиб, бозорда қўшимча таклиф юзага келтирди.

Эслатиб ўтамиз, 2025 йилда Ўзбекистонга пул ўтказмалари ҳажми 2024 йилга нисбатан 27,2 фоизга ошиб, 18,9 млрд долларни ташкил этган эди. Ушбу тушумлар ички валюта бозорида мувозанатни сақлаб туришга хизмат қилди.

Ривожланган давлатларда ва бир қатор Осиё мамлакатларида меҳнат қилаётган ўзбекистонликлардан келган пул ўтказмалари қарийб 22 фоизга ўсиб, 3,49 млрд долларга етди.