Octotelecom контент-провайдери 13131 қисқа рақамидан юбориладиган SMS-хабарномалар — Humo карталари бўйича операциялар ва қолдиқ тўғрисидаги ахборот хабарлари нархи ўзгаришини эълон қилди. Бу ҳақда компания матбуот хизмати 9 апрель куни маълум қилди.

Унга кўра, жорий йилнинг 1 майидан бошлаб ҳар бир кирувчи SMS-хабар нархи икки бараварга — 84,2 сўмдан 168,4 сўмга оширилади.

Компанияга кўра, нарх ўзгариши техник инфратузилмани қўллаб-қувватлаш харажатларининг ошиши, дастурий таъминотни ишлаб чиқиш, хизматнинг барқарор ва хавфсиз ишлашини таъминлаш, шунингдек, энергия ресурслари ва лицензия тўловлари нархининг ошиши билан боғлиқ.

«Humo SMS-хабарномаси» хизмати нархи оширилаётгани ҳақида Mobiuz, Ucell ва Beeline мобил операторлари ҳам хабар берган. Ушбу хизматни ўчириш учун 13131 қисқа рақамига «STOP» код сўзини SMS орқали юбориш керак.

Бундан ташқари, келгуси ойдан бошлаб Click тўлов ташкилоти томонидан тақдим этиладиган «880 SMS-хабардорномаси» хизмати нархи ҳам 168,40 сўм этиб белгиланади. Ушбу хизмат фойдаланувчиларга USSD-кодлар орқали амалга оширилган тўловлар ҳолати ҳамда карта уланган хизматлар бўйича хабарномаларни олиш имконини беради.

Ҳумо тўлов тизими сайтида бир марталик олти рақамдан иборат OTP-хавфсизлик кодлари SMS-хабарлар билан 13131 қисқа рақами орқали юборилиши кўрсатилган.

Бир марталик код фақат картага бириктирилган мобил рақамда ижобий баланс мавжуд бўлгандагина юборилади. SMS-хабар юбориш қиймати контент-провайдер тарифларига мувофиқ белгиланади. Бу хизмат эса Octotelecom томонидан кўрсатилади.

ЯИДХП маълумотларига кўра, Octotelecom 2024 йил февраль ойида рўйхатдан ўтган. Устав фонди 4,4 млрд сўм бўлган компания симсиз алоқа хизматларини кўрсатиш билан шуғулланади. Таъсисчилари Octo (99%) ва Octobank раиси Турсунов Искандар Бахтинурович (1%). Раҳбар сифатида Амирсаидов Жамшид Саидаброрович кўрсатилган.

Ўз навбатида, устав фонди 39,1 млрд сўм бўлган Octo тўлиқ Турсунов Искандар Бахтинуровичга тегишли. Бошқа дастурий таъминотлар ишлаб чиқарувчи компания раҳбари — Акрамов Умид Шуҳратович.