Марказий банк Ўзбекистонда валюта операцияларини амалга ошириш қоидаларига ўзгартиш ва қўшимчалар киритиш бўйича қарор қабул қилди. Бу ҳақда регулятор матбуот хизмати хабар берди.

Ҳужжатга кўра, эндиликда қайси давлат фуқароси бўлишидан қатъи назар, барча банк ҳисобварақлари орқали жисмоний шахслар бир-бирига шахсий мақсадларда (носавдо) пул ўтказиши мумкин бўлади.

Шунингдек, хорижлик жисмоний шахсларга ҳам мамлакат ичида устав фондига маблағ қўшиш, хайрия қилиш ҳамда мерос билан боғлиқ ички валюта операцияларини амалга оширишга рухсат берилади.

Юридик шахслар чет эл валютасида чиқарилган қимматли қоғозлар бўйича тўловларни амалга ошириш учун валюта сотиб олаётганда ортиқча ҳужжатлар талаб этилмайди. Бунда қимматли қоғоз чиқарилганини тасдиқловчи ҳужжатнинг ўзи етарли бўлади.

Хорижий инвесторлар фонд бозорида қимматли қоғозларни сотишдан тушган маблағларини ўз мурожаати асосида эркин равишда чет элга олиб чиқиши мумкин бўлади.

Барча валюта айирбошлаш операциялари, жумладан онлайн операциялар ягона тизимда ҳисобга олинади.

Шу билан бирга, юридик шахслар томонидан валюта сотиб олиш учун берилган буюртмаларда кичик хатолар бўлса, уларни тузатиш имконияти яратилади.

Банк кассаларидан нақд чет эл валютасини бериш тартиби ҳам аниқ белгиланди. Жисмоний шахслар ўз ҳисобварағидаги маблағлари доирасида валютани чекловсиз олиши мумкин.

Юридик шахсларга эса нақд валюта фақат аниқ белгиланган мақсадлар асосида берилади.