Ўзбекистонда фуқаролар банклардан шахсни тасдиқловчи ҳужжатларсиз олишлари мумкин бўлган нақд чет эл валютаси миқдори оширилади. Бу ҳақдаги идоравий ҳужжат 8 май куни давлат рўйхатидан ўтказилди.

Қайд этилишича, ҳужжат Адлия вазирлиги ташаббуси билан ишлаб чиқилган бўлиб, у 2886-12-сон билан рўйхатдан ўтган. Унга кўра, эндиликда мижозлар 500 АҚШ долларигача бўлган нақд чет эл валютасини паспорт, ID-карта ёки уларнинг ўрнини босувчи бошқа ҳужжатларсиз олишлари мумкин бўлади.

Амалдаги тартибга мувофиқ, ҳозирда бундай операциялар учун лимит 100 АҚШ долларини ташкил этади. Янги тартиб ушбу лимитни беш бараварга оширмоқда.

Ҳужжатга асосан, янги тартиб 3 ойдан кейин кучга киради. Шундан сўнг банк мижозлари кичик миқдордаги валюта айирбошлаш ёки нақдлаштириш операцияларини шахсни тасдиқловчи ҳужжатларсиз амалга ошириш имкониятига эга бўлади.

Марказий банк ҳамда Бош прокуратура ҳузуридаги Иқтисодий жиноятларга қарши курашиш департаменти қарор лойиҳаси 2026 йил март ойи охирида жамоатчилик муҳокамаси учун эълон қилинганди. Ҳужжатга мувофиқ, мижозларни идентификация қилиш тартиблари ҳам аниқлаштирилиши белгиланган.

Банклар жисмоний шахсларни биометрик паспорт, ID-карта ёки рақамли идентификация орқали текшириши керак бўлади. Шунингдек, пул ўтказмалари ва бошқа молиявий операциялар бўйича маълумотларни янада батафсил қайд этиш талаблари кучайтирилмоқда.