Солиқ қўмитаси савдо фаолияти билан шуғулланувчи айрим хўжалик юритувчи субъектларда савдо амалиётлари P2P — пластик картадан пластик картага пул ўтказмалари орқали амалга оширилаётган ҳолатлар таҳлил қилинаётганини маълум қилди.

Ижтимоий тармоқларда солиқ инспекторлари фуқароларнинг барча карталарини текширишга киришгани ва тез-тез пул ўтказмалари сабабли одамларни сўроққа чақираётгани, ҳар бир тушум учун тушунтириш хати ёзиш талаб қилинаётгани ҳақида хабарлар тарқалгач, қўмита ҳолат юзасидан тушунтириш берди.

Қайд этилишича, бундай операциялар орқали тушган айрим даромадлар солиқ ҳисоботларида акс эттирилмаслиги натижасида давлат бюджетига тегишли тушумлар тўлиқ шаклланмай қолмоқда. Шу муносабат билан солиқ органлари томонидан юридик шахсларда фаолият юритувчи раҳбар ходимларнинг банк пластик карталарига келиб тушган маблағлар юзасидан таҳлилий ўрганишлар олиб борилмоқда.

Аниқланган ҳолатлар асосида солиқ ҳисоботларида акс эттирилмаган даромадлар бўйича тегишли чоралар кўрилмоқда ҳамда солиқ тўловчиларга хабарномалар юборилмоқда.

“Бу жараён жазолаш ёки босим ўтказиш эмас, балки иқтисодий адолатни таъминлаш, яширин айланмаларни қисқартириш ва ҳалол меҳнат қилиб, қонун доирасида иш юритаётган тадбиркорларни қўллаб-қувватлашга қаратилган. Чунки ҳар бир тўланган солиқ — бу мамлакат тараққиёти, янги йўллар, мактаблар, шифохоналар ва халқ фаровонлиги учун қўйилган ҳиссадир”, дейилади хабарда.

Қўмита барча тадбиркорлик субъектларини амалдаги қонунчиликка қатъий риоя қилишга, савдо тушумларини тўлиқ расмийлаштиришга ва солиқ ҳисоботларида ҳаққоний акс эттиришга чақирди.

Ўзбекистонда 9 августдан тижорат банклари учун ички назорат қоидаларига киритилган ўзгартиришлар кучга киради. Унда гумонли ва шубҳали операцияларнинг янги мезонлари ҳам назарда тутилган бўлиб, 16 ёшга тўлмаганлар ҳисобварағига 16,5 млн сўмдан ортиқ маблағ келиб тушиши ёки ечиб олиниши гумонли операция сифатида баҳоланади.