Иқтисодиёт ва молия вазирлиги иккиламчи кўчмас мулк бозори учун ҳам ипотека кредитларига субсидия ажратишни истисно қилмаяпти. Бу ҳақда 12 май куни бўлиб ўтган очиқ мулоқотда маълум қилинди.

Вазирликнинг Урбанизация жараёнлари, уй-жой қурилиши, реновация ва ипотека дастурларини мувофиқлаштириш бошқармаси бошлиғи Расул Хамидов бугунги кунда буджет маблағларидан ажратиладиган субсидиялар фақат бирламчи бозорда уй-жой харид қилиш учун йўналтирилаётганини таъкидлади. Иккиламчи бозорга субсидия ажратиш масаласи эса ҳозирча кўриб чиқилаётгани йўқ.

Унинг сўзларига кўра, асосий мақсад — аҳолининг яшаш учун қулай ҳамда энергия самарадор уйларга кўчиб ўтишини рағбатлантириш. Шу билан бирга, бирламчи бозорни молиявий қўллаб-қувватлаш орқали қурилиш секторини ривожлантириш кўзда тутилган.

«Бу орқали нафақат ижтимоий соҳани, балки иқтисодиётни ҳам қўллаб-қувватлаш мақсад қилинган. Шунинг учун буджет маблағини иккиламчи бозорга ҳам бериш масаласи кун тартибида ҳозирча йўқ. Балки келгусида қайсидир миқдорда ёки қайсидир йўналишларда бериш мақсадга мувофиқ деб топилса, буни кўриб чиқишимиз мумкин», — деди Расул Хамидов.

Жорий йилнинг 16 мартидан ипотека кредитлари бўйича субсидиялар учун аризалар қабули бошланди. Уларни Давлат хизматлари марказлари, мйГов иловаси ёки мй.гов.уз портали орқали топшириш мумкин.