Ўзбекистонда ипотекага олинган уйда банк розилиги билан рўйхатдан ўтишга рухсат берилди. Бу ҳақда 12 май куни Иқтисодиёт ва молия вазирлигида бўлиб ўтган очиқ мулоқотда Ипотека ва уй-жой дастурларини молиялаштириш ва ҳисобини юритиш бўлими бошлиғи Жавоҳирбек Амонов маълум қилди.

Жорий йилнинг февраль ойида қабул қилинган президент фармони билан ипотека кредити асосида сотиб олинган уйга фуқароларни уй эгаси аризаси ва гаровга олувчининг (банк) розилиги билан яшаш жойи ва турган жой бўйича рўйхатдан ўтказишга рухсат берилиши белгиланган эди.

Амонов бу масала ўтган йилги очиқ мулоқотларда ҳам кўтарилганини, шу билан бирга, аҳоли томонидан ҳам «прописка» бўйича мурожаатлар келиб тушганини таъкидлади. Шундан келиб чиқиб, бунга рухсат берилган.

«Ҳозирги кунда бу тартиб амалиётга жорий этилган. Яъни, ипотекага сотиб олинган, банк гаровида бўлган уй-жойларга фармон қабул қилинган кундан бошлаб уй эгасининг аризаси ва банк рухсати билан фуқароларни «прописка»га қўйиш мумкин», — деди у.

Бундан ташқари, вазирлик бўлими бошлиғи ҳозирда ижтимоий солиқни ихтиёрий тўлиқ тўлаган ўзини ўзи банд қилган фуқароларга ҳам ипотека кредитлари ажратилаётганини маълум қилди. Бироқ, ҳозирча бу бўйича аниқ статистик маълумотлар мавжуд эмас.

Ушбу тартиб босқичма-босқич жорий этилиши белгиланган: 2026 йилда ўзини ўзи банд қилганларнинг охирги бир йил, 2027 йилда — икки, 2028 йилдан бошлаб эса охирги уч йиллик солиқлар ҳисобга олинади.