Ер участкасининг ижара шартномасини янги муддатга узайтириш тартиби белгиланди. Бу бўйича тегишли регламент ҳукумат қарори билан тасдиқланди.

Ҳужжат ер участкасининг ижара шартномасини янги муддатга узайтириш бўйича давлат хизматларини кўрсатиш тартибини белгилайди. Ариза берувчи ижара шартномаси муддатини узайтириш учун Давлат хизматлари марказлари ёки Ягона портал орқали мурожаат қилиши мумкин.

Аризага аввал расмийлаштирилган ер участкасининг ижара шартномаси илова қилинади. Агар мурожаатни бошқа шахс топширса, ер участкаси ижарачиси номидан берилган ишончнома ҳам тақдим этилиши керак.

Ижарага берувчи тегишли ваколатли органларнинг маълумотларини олганидан сўнг 10 иш куни ичида ер участкасидан мунтазам равишда фойдаланилмаётгани тўғрисида маълумот мавжудлигини текширади.

Шунингдек, ариза келишилгани ёки рад этилгани тўғрисидаги маълумотни ўз ичига олган хабарномани шакллантиради ва уни ариза берувчига юборади.

Давлат хизматларини кўрсатиш учун БҲМнинг 1 фоизи (4 120 сўм) миқдорида йиғим ундирилади.

Ернинг ижара шартномаси туман (шаҳар) ҳокимлиги томонидан имзолангандан сўнг автоматик тарзда ариза берувчига юборилади.